ევა გოცირიძის მიერ გაკეთებულ განცხადებას ადამიანის უფლებათა ევროპულ სასამართლოში საქართველოს მოსამართლეობის კანდიდატთა სიის ჩავარდნის თაობაზე საქართველოს სახალხო დამცველი უჩა ნანუაშვილი გამოეხმაურა.

მისი განცხადებით, სახალხო დამცველის აპარატმა ევროსაბჭოს ყველა შეკითხვას ობიექტურად უპასუხა, რომელიც სტრასბურგის მოსამართლეობის კანდიდატების შერჩევის პროცესში არსებულ ხარვეზებს ეხებოდა.

„ჩვენ ვსაუბრობდით იმ ხარვეზებზე ამ პროცესში, რომელიც თავიდანვე იყო. რაც შეეხებოდა პროცედურულ საკითხებს, თუნდაც იმას, თუ რატომ მოხდა ყველაზე უფრო მაღალქულიანი კანდიდატის დაბალქულიანით ჩანაცვლება. სახალხო დამცველს ყოველთვის აქვს კომუნიკაცია არაერთ ორგანიზაციასთან, მათ შორის ევროსაბჭოსთან და თუკი მათი მხრიდან დასმულ კითხვებზე ჩვენ გავეცით პასუხი, მე ვფიქრობ, ალბათ ჩვენი არგუმენტები გაცილებით უფრო დამაჯერებელი იყო მათთვის. მე ვფიქრობ, თითის გაშვერას სხვისკენ, სჯობს ალბათ გადახედონ იმ პროცედურებს და ხარვეზებს, რომელიც იყო და არსებობს და იქნებ შემდგომში მაინც ავიცილოთ ის პრობლემები, რომელსაც ადგილი ჰქონდა, სამწუხაროდ, ამ პროცესის დროს,“ - განაცხადა უჩა ნანუაშვილმა.