რა პოლიტიკური შეფასებები კეთდება პრეზიდენტის მიერ კაბელების საქმეზე მსჯავრდებულების შეწყალებაზე

პოლიტიკა - 13:28, 28 Jan, 2017

1247

პრეზიდენტის მიერ კაბელების საქმეზე მსჯავრდებულების შეწყალებას ხელისუფლებისა და ოპოზიციის წარმომადგენლები აფასებენ.

მმართველი გუნდის წევრები თემის კომენტირებისას ინსტიტუციების დაზიანებაზე აკეტებენ აქცენტს.

„შეწყალების აქტი ჰუმანური აქტია, მით უმეტეს, იმის გათვალისწინებით, რომ ერთ თვეში, დაახლოებით, მსჯავრდებულებს ისედაც უწევდათ საპატიმროს დატოვება. აქტის წინააღმდეგ არ შეიძლება, პრეტენზია არსებობდეს, მაგრამ იმ განცხადებას, რაც ამ აქტის გამოცხადებას ახლდა, ესეთი განცხადებები ინსტიტუციებს აზიანებს. არ შეიძლება საკითხის პოლიტიზირებაზე საუბარი, როცა საფუძველი არ არსებობს, სასამართლო არის დამოუკიდებელი,“ - განაცხადა გიორგი კახიანმა.

არჩილ თალაკვაძის განცხადებით, კი " იყო თუ არა ეს გადაწყვეტილება პოლიტიკური, ამას არსებითი მნიშვნელობა არ აქვს"

“ალბათ არსებითი მნიშვნელობა აქვს ორ რამეს: პირველი, თუ როგორ აისახა ეს გადაწყვეტილება კონკრეტულად ამ ადამიანების ცხოვრებაზე და ფაქტია, რომ ისინი დაბრუნდნენ სახლებში, რაც სასიხარულოა მათი ოჯახებისა და ახლობლებისთვის და მეორე, მართლმსაჯულების ხარისხი - ვფიქრობ, რომ მხარეთა შეჯიბრებითობა უზრუნველყოფილი იყო. საზოგადოება მომსწრე იყო მთელი ამ სასამართლო პროცესების, მსჯელობის, ეს იყო ღია პროცესი, ყველამ თავისი პოზიცია დააფიქსირა და მე სასამართლო პროცესებში ვერ დავინახე იმის პრობლემა, რომ მხარეებს საკუთარი პოზიციების დასაბუთების, გატანის, მსჯელობის პრობლემა ჰქონოდა. მედიის ინტერესიც საკმაოდ მაღალი იყო ამ საქმესთან დაკავშირებით და მივიღეთ ისეთი შედეგი, როგორიც მივიღეთ. ჩემთვის, როგორც პარლამენტის ერთი წევრისა და ამ ქვეყნის მოქალაქისთვის, ეს საქმე და ამბავი არის დემოკრატიული ქვეყნის მახასიათებელი, რომ ინსტიტუტებმა, თუნდაც განსხვავებული პოზიციებით, საკუთარი როლი შეასრულეს და საკუთარი როლი შეიტანეს ამ საქმეში, მათ შორის პრეზიდენტმა თავისი უფლებამოსილების ფარგლებში“, - აღნიშნა არჩილ თალაკვაძემ.

ე.წ. კაბელების საქმესთან დაკავშირებით ნაციონალურ მოძრაობაში ბრალის პოლიტიკურ ნაწილზე საუბრობენ.

„ეს ადამიანები იყვნენ ბიძინა ივანიშვილის მძევლები, იყვნენ პოლიტიკური პატიმრები, ეს ადამიანები გამოყენებულები იქნენ ერთ-ერთი ოპოზიციური პარტიის წინააღმდეგ პოლიტიკური ბრძოლის იარაღად. როგორც ჩანს, ამ ხალხს ეს ადამიანები მძევლებად აღარ სჭირდება და ციხიდან გაათავისუფლა, თუმცა საქართველოს პრობლემაა, რომ საქართველოში რჩებიან პოლიტიკური პატიმრები," - აცხადებს ზაზა ბიბილაშვილი.