ხელისუფლება ცდილობს ჩაშალოს 2018 წლის საპრეზიდენტო არჩევნები - არასამთავრობოები პრეზიდენტის არჩევის წესის ცვლილებებზე

პოლიტიკა - 12:58, 28 Jan, 2017

2122

არასამთავრობო სექტორის ნაწილი არ გამორიცხავს, რომ პრეზიდენტის არჩევის პირდაპირი წესის შენარჩუნებისთვის ქვეყნის პირველმა პირმა თანამდებობა ვადაზე ადრე დატოვოს. ენჯეოები აცხადებენ, რომ ხელისუფლება ცდილობს, ჩაშალოს 2018 წლის საპრეზიდენტო არჩევნები.

საკონსტიტუციო სამართლის სპეციალისტი, ვახუშტი მენაბდე, აცხადებს, რომ ზოგიერთ შემთხვევაში პრეზიდენტის უფლებამოსილებები უნდა შეიკვეცოს, რიგ საკითხებში კი მისი უფლებამოსილება უნდა გაძლიერდეს.

„პრეზიდენტის არჩევის წესის უნივერსალური მოდელი არ არსებობს, ეს დამოკიდებულია ბევრ სხვა საკითხზე კონსტიტუციაში. მე, პირადად ვფიქრობ, რომ ერთპალატიანი პარლამენტის პირობებში და ჩვენი ტერიტორიული მოწყობის პირობებში ძალიან კრიტიკულები უნდა ვიყოთ პრეზიდენტის ირიბი წესით არჩევის მიმართ. პრეზიდენტის უფლებები, ერთი მხრივ, შესაკვეცია დღეს მოქმედ მოდელშიც, მაგრამ მეორე მხრივ, არის საკითხები, სადაც მისი უფლებამოსილებები უნდა გაძლიერდეს“, - აღნიშნა ვახუშტი მენაბდემ.

სამართლიანი არჩევნებისა და დემოკრატიის საერთაშორისო საზოგადოების აღმასრულებელი დირექტორი, მიხეილ ბენიძე, თვლის, რომ " არაპირდაპირი წესით არჩეული პრეზიდენტი შეიძლება, იყოს მნიშვნელოვნად დამოკიდებული უმრავლესობაზე, რადგან პარლამენტს პრეზიდენტის იმპიჩმენტის პროცედურის საშუალება აქვს".

"საკონსტიტუციო კომისია თუ მიიღებს გადაწყვეტილებას პრეზიდენტის პირდაპირი წესის არჩევის გაუქმებასთან დაკავშირებით, ეს იქნება იმის ნიშანი, რომ 2018 წლის ოქტომბერში არ ჩატარდება პრეზიდენტის პირდაპირი წესით არჩევნები"- ეს შეფასება კი ექსპერტ კოტე ჩოკორაიას ეკუთვნის.