"მოვითხოვთ ხელისუფლებისგან, გაასაჯაროოს იმ სამხედროების მონაცემები, რომელთა ინფორმაცია რუსეთის გადაეცა"- ბიბილაშვილი

პოლიტიკა - 12:43, 28 Jan, 2017

2727

„ერთიანი ნაციონალური მოძრაობა“ ინტერპოლს წერილით მიმართავს და მოითხოვს, რომ ქართველი სამხედროების წინააღმდეგ ძებნა არ იქნას გამოცხადებული, რადგან ყველა მსგავსი შემთხვევა პოლიტიკურია და ინტერპოლის კონსტიტუციას ეწინააღმდეგება.
შესაბამისი განცხადება ზაზა ბიბილაშვილმა დღეს გამართულ ბრიფინგზე განაცხადა. ნაციონალური მოძრაობა პარლამენტში გია ცერცვაძის საკითხთან დაკავშირებით საგამოძიებო კომისიის შექმნის ინიციატივით გამოდის. გარდა ამისა, პარტია მთავრობისგან იმ სამხედროების ვინაობის გასაჯაროებას ითხოვს, რომელთა მონაცემებიც, ენმ-ის წევრების თქმით, რუსეთს გადაეცა.
„ჩვენ მოდუნების უფლება არ გვაქვს, ჩვენი კამპანია გრძელდება. მსგავსმა ფაქტებმა მიიღო სისტემური ხასიათი. ამიტომ გვსურს და მოვითხოვთ საქართველოს ხელისუფლებისგან, გაასაჯაროოს ყველა იმ სამხედროს მონაცემები, სახელები და გვარები, რომელთა შესახებ ინფორმაცია გადაეცა რუსეთის ხელისუფლებას პირდაპირ, ან ირიბად. მოვითხოვთ პარლამენტში ამ საქმესთან დაკავშირებით საგამოძიებო კომისია შეიქმნას. ამის პარალელურად, ჩვენ უახლოეს დღეებში ინტერპოლს წერილით მივმართავთ და მოვითხოვთ, ქართველი სამხედროების წინაღმდეგ არ იქნას გამოცხადებული ძებნა, რადგან ყველა მსგავსი შემთხვევა პოლიტიკურია და ინტერპოლის კონსტიტუციას ეწინააღმდეგება“, - განაცხადა ზაზა ბიბილაშვილმა.