"ხელისუფლების პასიური პოლიტიკა იმისთვის რომ რუსეთი არ გააბრაზონ"- ხიდაშელი ნატოს სამიტზე

პოლიტიკა - 18:31, 27 Jan, 2017

2541

თავდაცვის ყოფილი მინისტრის თინათინ ხიდაშელის თქმით, მოქმედი ხელისუფლება საგარეო ფრონტზე არასათანადოდ მუშაობს და არ ცდილობს, რომ საქართველო როგორც ასპირანტი ქვეყანა იყოს NATO-ში სათანადოდ წარმოდგენილი და დღის წესრიგში. აღნიშნული კომენტარი ხიდაშელმა ევროინტეგრაციის მინისტრის ვიქტორ დოლიძის განცხადებასთან დაკავშირებით გააკეთა, მინისტრმა განაცხადა, რომ საქართველო ნატოს მომავალ სამიტზე მონაწილეობას არ მიიღებს:

„ყველა სამიტი რაღაც კონკრეტულ ამოცანას ემსახურება და რაღაც კონკრეტული შედეგით მთავრდება, სამწუხაროდ ჯერ არ ყოფილა სამიტი, რომელიც ნატო-საქართველოს შესახებ იქნებოდა და ასეთი არც ბრიუსელის სამიტი იქნება. ყველა სამიტის წინ საქართველოს ყველა ხელისუფლება ყველაფერს აკეთებდა იმისთვის, რომ სამიტზე მოხვედრილიყო და მისი ქვეყნის საკითხები პრიორიტეტული ყოფილიყო. ივნისში ბრიუსელში შიდა მინისტერიალი ტარდებოდა ვარშავის სამიტის წინ, რომელზეც საქართველო არ იყო მიწვეული ოფიციალურად, მაგრამ მე მთელი ის პერიოდი ვიყავი ბრიუსელში და კულუარებში შეთანხმდა ის ტექსტი შავი ზღვის უსაფრთხოების შესახებ, რომელიც ვარშავის სამიტზე მივიღეთ ქვეყანამ. თავდაცვის მინისტრი ბოლო მინისტერიალსაც არ ესწრებოდა, ასეთი ღონისძიებების გამოტოვება არის იმ პოლიტიკის შედეგი, რომელსაც ჩვენ ყოველდღე ვხედავთ. ეს არის პასიურობა საგარეო ფრონტზე და ერთადერთი ამოცანა, რომ ვინმე არ გაგვიბრაზდეს. ეს არის აბსოლუტურად არასწორი პოლიტიკა. მთავარი ის კი არ არის ეს არის თუ არა შიდა სამიტი, მთავარია ჩვენ რას ვაკეთებთ ნატო-ტრამპის ურთიერთობის გარკვევის პროცესში და საქართველო როგორც ასპირანტი ქვეყანა იყოს სათანადოდ წარმოდგენილი და დღის წესრიგში. ამისთვის უნდა იბრძოდეს ჩვენი ხელისუფლება, ესწრებოდეს ყველა ღონისძიებას ოფიციალურად თუ კულუარებში.“- განაცხადა თინათინ ხიდაშელმა.

ხიდაშელის თქმით საქართველოს ხელისუფლების პოლიტიკა მიმართულია იმისკენ, რომ არა საკუთარი ქვეყნის უსაფრთხოება და ინტერესები დაიცვას, არამედ იმისკენ რომ რუსეთი არ გაბრაზდეს. ხიდაშელის განცხადებით ის ხელისუფლებაშ ყოფნის დროს ამას არ ეთანხმებოდა და მისი პოლიტიკა ამ ხაზის მიმდევარი არ იყო:

„მე არც მაშინ მესმოდა და არც დღეს არ მესმის ამგვარი პოლიტიკის. ჩემი პოლიტიკა არ იყო ამ ხაზის მიმდევარი. მე ვცდილობდი ფაქტიურად ყველა ტრიბუნიდან საქართველოს უსაფრთხოების საკითხი დამეყენებინა. ჩვენ ვართ ომის მდგომარეობაში უკვე, გუშინ იყო საქართველო ომში და დღესაც ომშია, ხან ჰიბრიდულ ომში, ხან პროპაგანდის ომში და ხან ცხელი ომის ფაზაში. ჩემი აზრით ჩვენ ყველაფერი , თითქმის შეუძლებელი რამეც კი უნდა გავაკეთოთ იმისთვის, რომ ჩვენ რაც შეიძლება მეტი სარგებელი მივიღოთ ამგვარი ღონისძიებებიდან.“- აღნიშნა ხიდაშელმა.

თინათინ ხიდაშელის თქმით, 6 დეკემბერს სტოლტენბერგი-კვირიკაშვილის შეხვედრის შემდეგ გამართულ პრესკონფერენციაზე ნატოს გენმდივანმა განაცხადა, რომ მომავალი სამიტის დღის წესრიგი და ფორმატი ჯერჯერობით დადგენილი არ იყო და ვარაუდი გამოთქვა, რომ ეს შეიძლებოდა ტრამპი-ნატოს ფარგლებში გამართულიყო, და ამ განცხადების კვალდაკვალ საქართველოს თავდაცვის მინისტრმა გააკეთა განცხადება, რომ საქართველო სამიტზე მონაწილეობას არ იღებდა.

„დამთავრებული არ იყო პრესკონფერენცია, რომ ლევან იზორამ თქვა, ჩვენ არ მივდივართ ბრიუსელშიო, ამაშია საქმე, ყოველგვარი ბრძოლის გარეშე და მონდომების გარეშე.“- განაცხადა ხიდაშელმა. მისი თქმით, როდესაც ორი მინისტრი იდენტურ განცხადებას აკეთებს ეს ნიშნავს იმას, რომ ეს განცხადებები პრემიერთანაცაა შეთანხმებული.