"ნატო-ს სამიტზე შესაძლოა საქართველო არ იყოს წარმოდგენილი, მაგრამ დღის წესრიგში იქნება"

"ნატო-ს სამიტზე შესაძლოა საქართველო არ იყოს წარმოდგენილი, მაგრამ დღის წესრიგში იქნება" - ვანო მაჭავარიანი

პოლიტიკა - 15:18, 27 Jan, 2017

1878

ნატო-ს 2017 წლის სამიტში, რომელიც ბრიუსელში გაიმართება, საქართველო და სხვა პარტნიორი ქვეყნები მონაწილეობას არ მიიღებენ. როგორც ცნობილია, ალიანსის ამ სამიტში მონაწილეობას მხოლოდ წევრი სახელმწიფოები მიიღებენ და მოისმენენ აშშ-ის ახალი პრეზიდენტის სამომავლო გეგმებს, ნატო-სთან ურთიერთობის საკითხებში.

აღნიშნულთან დაკავშირებით "ნიუპოსტთან“ საუბრისას უშიშროების საბჭოს მდივნის მოადგილე, ვანო მაჭავარიანი აცხადებს, რომ საქართველოს საკითხი სამიტის ფარგლებში ერთ-ერთი ძირითადი თემა იქნება:

„2017 წლის ნატო-ს სამიტი არის განსაზღვრული წევრი ქვეყნებისთვის, სადაც განხილული იქნება ევროატლანტიკური უსაფრთხოება, თავისთავად ის, რომ შავი ზღვის უსაფრთხოება, რომლის ერთ-ერთი მნიშვნელოვანი ნაწილი არის საქართველო, იქნება განხილული, ზუსტად ეს არის ის მიმართულება, რომელზეც აქტიურად ვმუშაობთ და უნდა ვიმუშაოთ, როგორც წევრ ქვეყნებთან, ასევე ნატო-ს უშუალო შტაბბინასთან.

ის, რომ ჩვენ ნატო-ს როგორც უკვე ჩატარებულ სამიტებზე, ისე მიმდინარე და მომავალი სამიტების მომზადებასთან დაკავშირებით, უშიშროების საბჭოზე პრეზიდენტის ჩართულობით მიმდინარეობს განხილვა, ეს ფაქტია და მომავალი უშიშროების საბჭო, ასევე ნატო-ს 2017 წლის სამიტის მომზადების საჭირო სამუშაოების განხილვით იქნება დაკავებული.

შეიძლება ამ ეტაპზე არ ვიყოთ წარმოდგენილი, როგორც უშუალო მონაწილე, მაგრამ დღის წესრიგში აქტიურად ვიქნებით წარმოდგენილი, გამომდინარე იმ ერთიანი რისკებისა, რომელიც არსებობს როგორც ევროპული, ისევე შავი ზღვის უსაფრთხოების კუთხით. პრეზიდენტი არის დელეგაციის ხელმძღვანელი, თავისთავად 2017-შიც ეს იქნება ჩვენი საქმიანობის ერთ-ერთი მნიშვნელოვანი ნაწილი“, - აცხადებს ვანო მაჭავარიანი.