მყიდველისაგან მიღებული ავანსის თანხები დღგ-ით იბეგრება

მყიდველისაგან მიღებული ავანსის თანხები დღგ-ით იბეგრება - შემოსავლების სამსახური

პოლიტიკა - 15:53, 26 Jan, 2017

4767

ავანსის დამატებითი ღირებულების გადასახადით დაბეგვრის გადაწყვეტილებას ბიზნესის წარმომადგენლები არ ეთანხმებიან. ცვლილება ძალაში პირველი იანვრიდან შევიდა. შემოსავლების სამსახურის უფროსმა გიორგი თაბუაშვილმა ეს გადაწყვეტილება ევროკავშირთან ასოცირების ხელშეკრულებით ნაკისრი ვალდებულებებით ახსნა და განაცხადა რომ მისი გადახედვა არ იგეგმება.

„როდესაც საქონლის ან მომსახურების მყიდველი ფულს უხდის გამყიდველს ამ თანხაში უკვე გათვალისწინებულია დღგ-ს წილი, ანუ ის ნაწილი რომელიც ბიუჯეტში უნდა იქნეს გადამისამართებული. ამიტომ აქ არაფერი უცნაური არაა. წინასწარი მუშაობა ამასთან დაკავშირებით ჩატარებული იყო. ზოგს უფრო მეტად ქონდა ამაზე ინფორმაცია, ზოგს ნაკლებად“- განაცხადა გიორგი თაბუაშვილმა.

შეგახსენებთ საქართველოს მთავრობის მიერ ინიცირებული კანონპროექტის შესაბამისად 2017 წლის 1 იანვრიდან დღგ-ით დაბეგვრას დაექვემდებარება საქონლის მიწოდებამდე ან/და მომსახურების გაწევამდე მყიდველისაგან მიღებული ავანსის თანხები, რა დროსაც დღგ-ით დასაბეგრი ოპერაციის თანხას წარმოადგენს მიღებული ავანსის თანხა დღგ-ს გარეშე (საგ. კოდ. კანონპრ. §161.1.ა.), ხოლო დასაბეგრი ოპერაციის განხორციელების დროს ავანსის მიღების მომენტი (საგ. კოდ. კანონპრ. §161.1.ა.ბ.დ.).

პირის მიერ მისაწოდებელი საქონლის ან/და გასაწევი მომსახურების ღირებულების მხოლოდ ნაწილის, ავანსის სახით, მიღების შემთხვევაში, ავანსის მიღების საანგარიშო პერიოდში დღგ-ით დაბეგვრას დაექვემდებარება მხოლოდ მიღებული ავანსის თანხა (საქონლის/მომსახურების ღირებულების ნაწილი), საქონლის/მომსახურების ღირებულების დარჩენილი ნაწილი დღგ-ით დაბეგვრას დაექვემდებარება საქონლის მიწოდების ან/და მომსახურების გაწევის საანგარიშო პერიოდში (საგ. კოდ. კანონპრ. §161.1.ა.).

ავანსის თანხების დღგ-ით დაბეგვრის ახალი წესი ვრცელდება უძრავი ქონების მიწოდების დაბეგვრაზეც, იმ განსხვავებით, რომ დასაბეგრი ოპერაციის განხორციელების დროდ (გარდა ავანსად გადახდილი თანხებისა) ითვლება საკუთრების უფლების რეგისტრაციისათვის მარეგისტრირებელ ორგანოში წარსადგენი საკუთრების უფლების დამადასტურებელი დოკუმენტის შედგენის თარიღი (საგ. კოდ. კანონპრ. §161.8.).

ავანსის თანხების დღგ-ით დაბეგვრის ახალი წესი არ მოქმედებს საქონლის (გარანტირებული სიმძლავრის, ელექტრო- ან თბოენერგიის, გაზის ან წყლის) ან მომსახურების რეგულარულად ან უწყვეტად მიწოდების/გაწევის შემთხვევებზე (საგ. კოდ. კანონპრ. §§161.1.ა.ბ.ბ.; 161.1.ა.ბ.გ. ).