ომბუდსმენი თეა წულუკიანისგან ან მტკიცებულებებს ან ბოდიშის მოხდას ითხოვს

პოლიტიკა - 17:29, 25 Jan, 2017

2539

საქართველოს სახალხო დამცველი გამოეხმაურა იუსტიციის მინისტრის ბრალდებას იმასთან დაკავშირებით, რომ ევროსასამართლოს მოსამართლეების კანდიდატურის ჩაგდებაში მნიშვნელოვანი როლი ენმ-მ, ომბუდსმენმა და ზაზა ხატიაშვილმა ითამაშეს. უჩა ნანუაშვილი ბრალდებებს ცილისწამებას უწოდებს და ან მტკიცებულებებს ან ბოდიშის მოხდას ითხოვს:

“პირდაპირ შეიძლება ითქვას, რომ ეს არის ცილისწამება, ან მან წარმოადგინოს ამის დამადასტურებელი საბუთი, ასევე დაასახელოს ინფორმაციის წყარო, რომ თითქოს მე ჩავაგდე კონკრეტული სია და ასევე ქვეყნებს მოვუწოდებდი ამ სიის წინააღმდეგ. მეორე, სახალხო დამცველმა მანამდე არაერთხელ აღნიშნა იმ ხარვეზების შესახებ, რომელიც ამ პროცესში არსებობდა - საუბარია სწორედ მოსამართლეების შერჩევის პროცესში. მათ შორის, ჩვენთვის იყო გაუგებარი თუ რატომ მოხდა თუნდაც ერთი კანდიდატურის ჩანაცვლება მეორით, როცა უფრო მაღალი შეფასების მქონე კანდიდატი რეალურად შეიძლება ითქვას არ შეფასდა და მის ნაცვლად იქნა წარდგენილი სხვა, დაბალი შეფასების კანდიდატი. კითხვის ნიშნები არაერთხელ დაისვა, თუმცა პასუხი ვერ მივიღეთ. ჩემთვის ეს შეფასება შეურაცხმყოფელი და გაუგებარია. ყველამ უნდა აიღოს პასუხისმგებლობა საკუთარ სიტყვაზე ან უნდა წარმოადგინოს ამის დამადასტურებელი კონკრეტული ფაქტი ან ბოდიში უნდა მოიხადოს.” – განაცხადა უჩა ნანუაშვილმა.