"ბავშვს ჩაქცევები და ნაკაწრები აღენიშნება, ამბობს მასწავლებელმა მცემაო"- რა მოხდა 153-ე საბავშვო ბაღში

შემთხვევა - 12:46, 25 Jan, 2017

20487

თბილისის 153-ე ბაღის ერთ-ერთი აღსაზრდელის მშობლის მტკიცებით, მისი შვილი მასწავლებელმა სცემა. ბავშვის დედა ოლიკო თითიაშვილი აცხადებს, რომ სამართალდამცავებს მას შემდეგ მიმართა, რაც შვილის სხეულზე სილურჯეები შეამჩნია.

თავის მხრივ საპატრულო პოლიციამ მშობელთან ერთად არასრულწლოვანი იაშვილის კლინიკაში გადაიყვანა. მედიკოსები ამბობენ, რომ ბავშვს კისრისა და სახის არეში ზედაპირული დაზიანებები ნამდვილად აღენიშნებოდა, თუმცა ექიმებს უჭირთ იმის თქმა თუ რამ გამოიწვია აღნიშნული დაზიანებები.

"მასწავლებელმა გამომიყვანა ბავშვი და მითხრა - ოლიკო, ბავშვს ალერგია ხომ არ აქვსო, ნაკაწრები აქვს და ჩაქცევებიო. თვითონვე მიჩვენა ბავშვის სხეულზე არსებული დაზიანებები. სახლში, რომ მივედი დავეჭვდი. პატრული გამოვიძახე, პოლიციაში წავედით, შემდეგ პოლიკლინიკაში გადაგვიყვანეს. ბავშვმა პირდაპირ თქვა, რომ თამუნა მასწავლებელმა მცემაო. ჩაქცევები ჰქონდა ყურის ბიბილოშიც"- აცხადებს მშობელი.

რაც შეეხება უშუალოდ აღმზრდელს, ის მედიასთან კომენტარს არ აკეთებს, მასწავლებელი მხოლოდ იმას ამბობს, რომ ბავშვი არ უცემია.

153-ე ბაღის საქმის მწარმოებელმა "ნიუპოსტს" განუცხადა, რომ მათ ჯგუფებში ვიდეო-კამერები დამონტაჟებული არ აქვთ, შესაბამისად უცნობია რა მოხდა გაკვეთილის მიმდინაეობისას.

"მიმდინარეობს მოკვლევა, სხვას ვერაფერს გეტყვით, მასწავლებელი უარყოფს ბავშვის ცემის ფაქტს"- აღნიშნეს ბაღში.

ბაგა-ბაღების მართვის სააგენტოში ფაქტზე მოკვლევა დაიწყო. მასწავლებელი სააგენტოში უკვე დაიბარეს.

გამოძიება დაიწყო საქართველოს შინაგან საქმეთა სამინისტრომაც. როგორც "ნიუპოსტს" უწყებაში განუცხადეს გამოძიება სისხლის სამართლის კოდექსის 126-ე მუხლის პირველი ნაწილის პრიმა მუხლით დაიწყო, რაც არასრულწლოვანის მიმართ ჩადენილ დანაშაულს გულისხმობს.