,,სტრასბურგის გადაწყვეტილბაზე პასუხისმგებლობა ხელისუფლებას ეკისრება“ - ბაჩუკი ქარდავა მოსამართლეთა კანდიდატების ჩავარდნაზე

პოლიტიკა - 19:30, 24 Jan, 2017

1995

ევროპის საბჭოში სტრასბურგის მოსამართლეთა შერჩევის კომიტეტის სხდომაზე ქართული მხარის მიერ წარდგენილი სამივე მოსამართლის კანდიდატურა ჩავარდა. ევროპის საბჭომ კანდიდატების სია უკან დააბრუნა, შესაბამისად საქართველოში მოსამართლეთა შესარჩევად ახალი კონკურსი უნდა ჩატარდეს.

სტრასბურგის გადაწყვეტილებას აფასებს ,,ახალი ერთობა საქართველოსთვის“ წევრი, ედპ-ს ლიდერი ბაჩუკი ქარდავა, რომელიც ,,ნიუპოსტთან“ ამბობს, რომ აღნიშნული ფაქტი მიანიშნებს იმაზე, რომ ქართული სასამართლოს დამოუკიდებლობა დიდი კითხვის ნიშნის ქვეშ დგება, რაც ევროპის მხრიდან ამ ინსტიტუტის ნდობის დფიციტზე მიანიშნებს.

,,ის, რაც დღეს ევროპის საბჭოში სტრასბურგის მოსამართლეთა შერჩევის კომიტეტზე მოხდა, არ აქვს მნიშვნლეობა რა არის ოფიციალური არგუმენტი -არჩევნის წესი თუ სხვა, ხაზს უსვამს იმას, რომ, ქართული სასამართლოს დამოუკიდებლობა დიდი კითხვის ნიშნის ქვეშ დგება. ეს ზოგადად ქვეყანაში დემოკრატიული ინსტიტუტების მიმართ ნდობის დეფიციტზე მეტყველებს. ამ ვითარებაში, პროდასავლური რიტორიკა ქმედებაში ანტიდასავლურია. ეს კიდევ ერთი წვეთია, რომელიც საქართველოს ევროპისკენ მიმავალ გზაზე სერიოზულ ბარიერებს უქმნის.

ცხადია, რომ დღეს ვერავის მოატყუებ, ერევა თუ არა ხელისუფლება მოსამართლების არჩევის წესსა თუ დანიშვნაში. თუნდაც ამ მოცემულ ვითარებაში, ფაქტია, რომ მთავრობის მიერ წარდგენილი მოსამართლეების, მათი არჩევნის წესის მიმართ, ჩვენი ქვეყნისდა სამარცხვინოდ, უნდობლობა გამოავლინა ევროპულმა სასამართლომ. ამაზე პასუხისმგებლობა ხელისუფლებას ეკისრება.

ეს არის შედეგი იმისა, რომ ადამიანის უფლებების დაცვაზე მეტად, რაც სტრასბურგის მოსამართლეებს ევალებათ, გათვალისწინებული იყო საქართველოს ხელისუფლების ინტერესები მათი შერჩევის პროცესში“ - განაცხადა ბაჩუკი ქარდავამ.

ქართულ მხარეს მოსამართლეების კანდიდატებად წარდგენილი ჰყავდა: ევა გოცირიძე, გიორგი ბადაშვილი და ალექსანდრე ბარამიძე.