"ეს არის გამოცხადებული ღალატის ქრონიკა - რუსულ სპეცსამსახურებთან ხელისუფლების თანამშრომლობის აღიარება"

"ეს არის გამოცხადებული ღალატის ქრონიკა - რუსულ სპეცსამსახურებთან ხელისუფლების თანამშრომლობის აღიარება" - დეკანოიძე ცერცვაძის საქმეზე

პოლიტიკა - 18:06, 23 Jan, 2017

3258

უკრაინის ნაციონალური პოლიციის ყოფილი ხელმძღვანელი და საქართველოს განათლების ექს მინისტრი ხატია დეკანოიძე უკრაინაში დაკავებულ ვიცე-პოლკოვნიკ გიორგი ცერცვაძესთან დაკავშირებით "ქართული ოცნების" დეპუტატის ზაქარია ქუცნაშვილის განცხადებას "კიდევ ერთ აღიარებას უწოდებს, რომლითაც დადასტურდა, რომ ხელისუფლება ოკუპანტი ქვეყნის უშიშროების სამსახურთან თანამშრომლობს".

"ეს იყო საქართველოს ხელისუფლების მხრიდან აღიარებითი ჩვენება, რომ ქართული სპეცსამსახურები და მთავრობა პირდაპირ თანამშრომლობს რუსეთის სპეცსამსახურებთან. ეს არის აღიარებითი ჩვენება, რომ ნებისმიერი ჯარისკაცი, ეს იქნება შსს ან თავდაცვის სამინისტროდან დღევანდელი ხელისუფლების პირობებში დარტყმისა და საფრთხის ქვეშაა, ნებისმიერ დროს ისინი შიძლება ძებნაზე აღმოჩნდნენ, ალბათ არიან ძებნაზეც და შემდგომ გადასცენ რუსეთს, რომ მერე მოხდეს მათი ფიზიკური ლიკვიდაცია.

ჩემი აზრით, ქუცნაშვილის სკანდალური განცხადება ნიშნავს იმას, რომ საქართველოს ხელისუფლება დირექტივებს იღებს რუსეთიდან. ვინმეს თუ ეჭვი ეპარებოდა რა მიზანს ემსახურებოდა "გაზპრომთან" დადებული ხელშეკრულება დღეს ყველაფერი ნათელია. მე როგორც ადამიანი, რომელიც დაიბადა და გაიზარდა ამ ქვეყანაში, ვითხოვ საქართველოს ხელისუფლებისგან პასუხს, რატომ თანამშრომლობს ის ოკუპანტი ქვეყნის ხელისუფლებასთან და რატომ აგდებს ჩვენი ჯარისკაცების სიცოცხლეს საფრთხეში და რატომ არ არის ანგარიშვალდებული ის ამ საკითხთან დაკავშირებით საქართველოს მოსახლეობასთან. ეს არის გამოცხადებული ღალატის ქრონიკა, არამხოლოდ საერთაშორისო საზოგადოებამ, არამედ ჩვენმა არასამთავრობოებმა, ადამიანებმა, ჯარისკაცებმა სერიოზული შეფასება უნდა მისცენ"- აღნიშნა "ნიუპოსტთან" ხატია დეკანოიძემ.

ყოფილი მაღალჩინოსანი აცხადებს, რომ ხელისუფლების ქმედებები ქვეყნის უსაფრთხოებას ძირს უთხრის.

"ნებისმიერი ჩვენი ჯარისკაცი რომელიც 2008 წელს რუსეთ-საქართველოს ომის დროს თავის ქვეყანას სიცოცხლის ფასად იცავდა დღეს საფრთხის წინაშეა, რადგან მათი მონაცემები სავარაუდოდ შს სამინისტროს გადაცემული აქვს ოკუპანტი ქვეყნის სპეცსამსახურებისთვის. საქართველოს ხელისუფლება ამ გზით ხრიკს იყენებს - თვითონ არ აკავებს და რუსეთს ეხმარება მათ დაჭერაში. როდესაც საქართველოს ხელისუფლება და შს სამინისტრო თავს იმართლებს, რომ მათ არ იცოდნენ რაზე იყო ქართველი ჯარისკაცი ძებნილი, თურმე პროკურატურამ არაფერი არ იცის და არაფრის გაკეთება შეუძლია, როცა არცერთი ბერკეტი არ არის გამოყენებული ქართველი ჯარისკაცის ციხიდან დასახსნელად, ეს არის პირდაპირი აღიარება, რომ ჩვენი ქვეყანა რუსულ სპეცსამსახურებთან თანამშრომლობს და მათთან უფრო მჭიდრო კავშირი აქვს, ვიდრე სხვა ჩვენს სტრატეგიულ პარტნიორთან"- განმარტავს უკრაინის ნაციონალური პოლიციის ყოფილი ხელმძღვანელი.

ხატია დეკანოიძე "ნიუპოსტთან" აცხადებს, რომ გიორგი ცერცვაძეს კარგი ადვოკატები ჰყავს. ყოფილი მაღალჩინოსანი იმედს გამოთქვამს, რომ უკრაინული სასამართლო ჯარისკაცს რუსეთს არ გადასცემს, რადგან მისი თქმით, ამ სცენარის განვითარების შემდეგ ქართველ ჯარისკაცს სიკვდილი ელის.

"იმედი მაქვს, რომ სოლომენსკის რაიონული სასამართლო არ მიიღებს გადაწყვეტილებას და არ გადასცემს ცერცვაძეს რუსეთს, რადგან ამ შემთხვევაში მას ფიზიკური ლიკვიდაცია ელის. ეს არის ჯარისკაცი, რომელიც უშუალო მონაწილეობას იღებდა 2008 წლის ომში და ასევე არის აფხაზეთის ომის მონაწილე. არსებობს ფილმი რუსეთ-საქართველოს ომის შესახებ, სადაც ცერცვაძე კომენტარებს აძლევს. როგორც ჩანს საქართველომ უკვე გადასცა რუსეთს ბაზები, რომელშიც მაღალი რანგის სპეცრაზმელების შესახებ ინფორმაციაა ასახული. ამიტომ, მხოლოდ უკრაინული მხარის იმედად შეიძლება ვიყოთ. ცერცვაძეს ძალიან კარგი უფლებადამცველები ჰყავს"- განაცხადა დეკანოიძემ.