საპარლამენტო უმცირესობის ერთ-ერთი წევრი გივი თარგამაძე ამბობს, რომ საქართველოს ძალოვან უწყებებს არცერთი საერთაშორისო რეგულაცია არ ავალდებულებს, რომ ჯარისკაცის საპასპორტო და გადაადგილების შესახებ მონაცემები ოკუპანტი ქვეყნისთვის გაეგზავნა.

"პოლიციის პოლკოვნიკ ზურაბ მაისურაძისა და ვიცეპოლკოვნიკ გიორგი ცერცვაძის მიმართ რუსეთის ფედერაციის მხრიდან დევნაში საქართველოს დღევანდელი ხელისუფლების დახმარება, სამწუხაროდ, მხოლოდ ტენდენციის გაგრძელებაა და არა გამორჩეული მიდგომა. ახალი აქ ის არის, რომ შს სამინისტრომ თანამშრომლობისა და პერსონალური ინფორმაციის ოკუპანტისთვის გადაცემის ლეგიტიმაცია სცადა. სცადა უხეიროდ, მოუქნელად. არცერთი საერთაშორისო ინსტიტუტის, თუნდაც ინტერპოლის, მოთხოვნა, არ ავალდებულებს უპირობოდ სახელმწიფოს მისი მოქალაქის, მითუფრო სამხედრო, ან ძალოვანი უწყების წარმომადგენლის პერსონალური ინფორმაციის გადაცემას რომელიმე, მით უფრო ოკუპანტი ქვეყნისთვის, რომლის წინააღმდეგ საომარ მოქმედებებშიც მონაწილეობდნენ ეს პირები.

ხაზს ვუსვამ - ასეთი ვალდებულება არ არსებობს. მეორეს მხრივ, არსებობს სახელმწიფოს, მისი კონკრეტული სტრუქტურების - ამ შემთხვევაში, ინტერპოლის საქართველოს ბიუროს, შსს საზღვრის დაცვის დეპარტამენტის, პროკურატურის ვალდებულება, გააფრთხილოს საკუთარი მოქალაქე მის მიმართ წარმოებული დევნის შესახებ, საზღვრის გადაკვეთის შემდეგ ამ დევნის გამო მის წინაშე წარმოშობილი საფრთხეების შესახებ. არსებობს საქართველოს ხელისუფლების ვალდებულება, დაიცვას საკუთარი მოქალაქე. ხსენებული პირების მიმართ სახელმწიფომ არ დაიცვა საკუთარი ვალდებულებები.

მეტიც, მან ხელი შეუწყო საკუთარი მოქალაქეების დევნას ოკუპანტის მხრიდან. ამდენად, როგორც ამ ხელისუფლების, თუნდაც ფორმალური, პირველი პირი, ასევე ხსენებული სტრუქტურების პირველი პირები ვალდებულნი არიან, არა ზეგ, არა მას მერე, რაც ივანიშვილი მისცემს მითითებებს, არამედ დღესვე, დაუყოვნებლივ გააკეთონ განმარტებები საკუთარი ქმედებების შესახებ. არგუმენტების არარსებობისა თუ არადამაჯერებლობის შემთხვევაში ჩნდება სრული საფუძველი, მათი მოქმედებები დაკვალიფიცირდეს, როგორც სახელმწიფო ინტერესებისა და საქართველოს მოქალაქეთა ინტერესების ღალატი, რასაც თავისთავად უნდა მოყვეს მათი ხელისუფლებიდან ჩამოცილება და შემდგომი სისხლის სამართლებრივი გამოძიება"- აცხადებს თარგამაძე.