საპარლამენტო უმცირესობა გია ცერცვაძეს თავდებში უდგება

პოლიტიკა - 15:23, 23 Jan, 2017

1922

საქართველოს პარლამენტის უმცირესობა უკრაინაში დაპატიმრებულ ქართველ სამხედროს გია ცერცვაძეს თავდებში უდგება. საპარლამენტო უმცირესობამ დაასრულა მუშაობა მიმართვაზე, რომელსაც უკრაინის შესაბამის უწყებებს გაუგზავნის. პარტია „ევროპული საქართველო“ გია ცერცვაძის და მისი ადვოკატისთვის შესაბამისი კონსულტაციების გაწევისთვის მზადყოფნას აცხადებს, ასევე მათ მოუწოდებს გამოიყენონ ადამიანის უფლებათა კონვენციის 39-ე მუხლი, რომელიც საშუალებას მისცემს დაკავებულს, რომ თავი აარიდოს ექსტრადიციას:

"ჩვენ შევიმუშავეთ შუამდგომლობა, სადაც საპარლამენტო უმცირესობის დეპუტატები თავდებში ვუდგებით ვიცე-პოლკოვნიკ ცერცვაძეს, რომელიც ამჟამად დაკავებულია უკრაინაში და მივმართავთ უკრაინის შესაბამის ორგანოებს, რათა არცერთ შემთხვევაში არ მოხდეს ცერცვაძის გადაცემა რუსეთის სამართალდამცავებისთვის, ასევე ვუდგებით თავდებში, რომ იგი გათავისუფლდეს პატიმრობიდან. არაერთი შემთხვევაა, როდესაც სასამართლომ არ დაუშვა პირთა გადაცემა ისეთი სახელმწიფოებისთვის, როგორიცაა რუსეთი და სხვა ქვეყნები, სადაც საფრთხის ქვეშ დგას ადამიანის უფლებათა დაცვა, ასევე რათა ისინი არ დაექვემდებრონ არაადამიანურ მოპყრობასა და წამებას“- განაცხადა „ევროპული საქართველოს“ წევრმა გიორგი ტუღუშმა.

ამავე პარტიის წევრის ტარიელ ლონდარიძის თქმით, აღნიშნულ საქმეში იკვეთება საქართველოს სახელმწიფოს უნიათობა და დაუდევრობა.

„სახელმწიფოში მოშლილია უსაფრთხოებისა და თავდაცვის სისტემა, ჩვენი ჯარისკაცები რომლებიც რუსეთის წინააღმდეგ იბრძოდნენ დღეს არიან მსხვერპლი რუსეთის მხრიდან ძებნისა. მოვითხოვთ შს მინისტრმა მკაფიო განმარტებები გააკეთოს ამასთან დაკავშირებით.“- განაცხადა ტარიელ ლონდარიძემ.