საპარლამენტო უმრავლესობის ერთ-ერთი ლიდერის მანანა კობახიძის კანდიდატურა საკონსტიტუციო სასამართლოს მოსამართლის ვაკანტურ თანამდებობაზე განიხილება. აღნიშნულს თავად კობახიძე ადასტურებს. მისი განცხადებით, მმართველ გუნდში ამ თემაზე კონსულტაციები უკვე დასრულებულია:

„გიდასტურებთ, რომ ასეა, მაგრამ სჯობს დაუკავშირდეთ ფრაქციის ხელმძღვანელს მამუკა მდინარაძეს და ის გეტყვით იმიტომ, რომ ის არის უფლებამოსილი ამ თემაზე,“ - აცხადებს კობახიძე.

მამუკა მდინარაძის განცხადებით კი, ვაკანტურ თანამდებობაზე ოპტიმალურ გადაწყვეტილებას უახლოეს დღეებში მიიღებენ.

„ერთ-ერთი არის ქალბატონი მანანა. ჩვენ ვცდილობთ, რომ წარვადგინოთ საკონსტიტუციო სასამართლოს მოსამართლედ, რომელიც იქნება პროფესიონალი. იქნება მოლოდინი, რომ ის შეძლებს ობიექტურობას და ასევე მნიშვნელოვანი ფაქტორია, რომ მან მიიღოს უმრავლესობის მხარდაჭერა. ამიტომ, ამ კრიტერიუმების გათვალისწინებით ვცდილობთ, რომ შევძლებთ ოპტიმალური კანდიდატურის არჩევას,“ - განაცხადა მამუკა მდინარაძემ.