ფრაქცია „ნაციონალური მოძრაობა“ დღეს ბიუროს სხდომაზე „გაზპრომთან“ დაკავშრებით რეზოლუციის პროექტს წარადგენს. ოპოზიცია რუსულ ენერგოკომპანიასთან გაზაფორმებელი ხელშეკრულების გასაჯაროებას და მთავრობის პასუხისმგებლობის საკითხის დაყენებას ითხოვენ:

„ჩვენ ვითხოვთ მთავრობის პასუხისმგებლობას, ხელშეკრულების გასაჯაროებას და სხვა მნიშვნელოვანი ასპექტები, რომელიც ამ მოღალატეობრივ ხელშეკრულებას უკავშირდება. იმიტომ, რომ ერთის მხრივ, ეს აჩვენებს რამდენად უსუსური და არაკომპეტენტურია ჩვენ სამთავრობო გუნდი, მაგრამ იმავდროულად ძალიან მკაფიოდ უსვამს ხაზს თუ რამხელა პოლიტიკური ბერკეტები მოიპოვა რუსეთმა ჩვენს ხელისუფლებაზე,“ - განაცხდა პეტრე ცისკარიშვილმა.

რეზოლუციის პროექტს მხარს უჭერს ევროპული საქართველოც:

ჩვენ მას ასევე მხარს დავუჭერთ ბუნებრივია. აუცილებელია, რომ ეს ხელშეკრულება გასაჯაროვდეს. აუცილებელია გაიმართოს პოლიტიკური დებატები ამ საკითხთან დაკავშირებით. თუ ხელისუფლება და კალაძე გაურბიან ამ საკითხზე საუბარს, ჩვენ იძულებულს გავხდით უმრავლესობას ისაუბრონ გაზპრომის ხელშეკრულებასთან დაკავშირებით,“ - აცხადებს ფრაქცია ევროპული საქართველოს თავმჯდომარე სერგო რატიანი.

ოპოზიციის მოთხოვნებს უსაფუძვლოს უწოდებენ საპარლამენტო უმრავლესობაში:

„არანაირი რეზოლუცია საჭირო არ არის, რადგანაც არსი და აზრი რეზოლუციის არ იძებნება. ყველა დაინტერესბული მხარისთვის გასაგებია, რა შინაარსს შეიცავს ეს. არის საჯარო ნაწილი, რომელიც სავსებით გასაგებია და არის კომერციული ნაწილი, რომელზეც მხარემ პასუხისმგებლობა აიღო, რომ არ გაასაჯაროებს. არ საჭიროებს ეს დამატებით მინისტრის ან სხვა პირის დაბარებას პარლამენტში,“ - განაცხადა ქართული ოცნების წევრმა დავით მათიკაშილმა.