P.S.-ის ექსკლუზივი: ,,გაზპრომთან“ დადებული ხელშეკრულების საიდუმლო დეტალები

პოლიტიკა - 23:45, 22 Jan, 2017

4165

რა ფასს გადაიხდის რუსეთის საქართველოს ტერიტორიაზე გაზის ტრანზიტის სანაცვლოდ? - პოსტსკრიპტუმისთვის ცნობილი გახდა, რომ ტარიფი, რომლითაც საქართველო გაზპრომს მოემსახურება, ემთხვევა უკრაინულ ტარიფს, თუმცა უკრაინული მხარე კარგა ხანია ამ ტარიფის სამჯერ გაზრდას მოითხოვს.
„P.S."- ში გაზპრომთან დადებულ ხელშეკრულებასთან დაკავშირებით გარკვეული კალკულაციები გაკეთდა. როგორც ცნობილია საქართველოს ტერიტორიაზე ტრანზიტის სახით რუსეთიდან სომხეთში ყოველწლიურად გადის 2 220 000 000 კუბური მეტრი ბუნებრივი აირი, საქართველოს კი ამ ტრანზიტის საფასურად რჩებოდა 10% , დაახლოებით 220 000 000 კუბური მეტრი აირი. თუ ბუნებრივი აირის ამ მოცულობას საქართველო გაზპრომისგან შეიძენდა, 185$ ლარად თანხაში შეადგენდა 40 700 000 დოლარს. პოსკრიპტუმის მიერ მოპოვებული ინფორმაციის თანახმად, რომელსაც არცერთი მხარე ოფიციალურად არ ადასტურებს, საქართველოზე გაზის გატარებაში გაზპრომი ყოველ 1000 კუბურ მეტრში 6 დოლარს გადაიხდის, ანუ საქართველო ყოველწლიურად მიიღებს 13 200 000 დოლარს. იმ თანხით რაც საქართველო გაზის გატარებისთვის მიიღებს , შესაძლებელია 71 000 000 კუბური მეტრი აირის შეძენა, რაც 149 000 000 კუბური მეტრით ნაკლებია იმ რაოდენობაზე, რასაც საქართველო ნატურით ანაზღაურების დროს იღებდა. რუსეთის მიერ მოწოდებულ ამ გაზს, საქართველო დენის და გაზის ტარიფის დასაბალანსებლად იყენებდა.
ზუსტად რა მოცულობის ბუნებრივი აირი დააკლდება საქართველოს ენერგო სისტემას, ენერგეტიკის სამინისტროში ისევ კომერციული საიდუმლოს მოტივით, არ აკონკრეტებენ, თუმცა მიუთითებენ, რომ საჭიროების შემთხვევაში საქართველოს რუსული გაზის ფიქსირებულ ფასად შეძენის საშუალება ექნება.

გაზპრომმა ფულად ანაზღაურებაზე გადასვლის საკითხი პირველად ერთი წლის წინ დააყენა, მაშინ რუსული მხარე აცხადებდა რომ გაზრდილი მოხმარების გამო საქართველოზე გამავალი მილსადენის მთელი სიმძლავრე, 2.5 მილიარდი კუბი, სომხეთის მოსამარაგებლად სჭირდებოდა და საქართველოსთვის ნატურით გადასახდელი აირი უბრალოდ აღარ რჩებოდა.

ბუნებრივი აირის რა მოცულობის მიღება შეეძლება საქართველოს სინამდვილეში უცნობია.