ოკუპირებულ აფხაზეთში ე.წ. საფეხმავლო გადასასვლელებით მოსარგებლე მოქალაქეებს აჯარიმებენ

პოლიტიკა - 18:43, 22 Jan, 2017

2789

აფხაზეთის მარიონეტული რეჟიმი საოკუპაციო ხაზის გასწვრივ კონტროლს ამკაცრებს და აცხადებს, რომ მოქალაქეებს გადადგილება მხოლოდ ენგურის ხიდის მეშვეობით იქნება შესაძლებელი.

ამ მიზნით მარიონეტულმა რეჟიმმა ხიდზე ე.წ. სასაზღვრო-გამშვები პუნქტი შექმნა - ხიდზე ჩვეულებრივი ავტობუსი დგას და ე.წ. მესაზღვრეები მოქალაქეებს სპეციალური საშვების აღებას ავალდებულებენ, რომელსაც რუსი ოკუპანტები და ადგილობრივი ადმინისტრაციის წარმომადგენლები გარკვეული გადასახადის გადახდის შემდეგ იძლევიან. დამატებითი გადასახდის გადახდა ხდება იმ შემთხვევაში, თუ მოქალქაეს თან 10 კგ-ზე მეტი ბარგი აქვს.

მარიონეტული რეჟიმის განცხადებით, ეს გადაწყვეტილება აფხაზეთის ე.წ. პრეზიდენტმა ერთი კვირის წინ მიიღო და მისი მიღება ე.წ. საგადასახადო შემოსავლების გაზრდის მიზეზითაც არის განპირობებული

აღნიშნული მიზეზით, 22 იანვარს სპეციალური რეიდი ჩატარდა ე.წ. საფეხმავლო გადასასვლელ ფონებზე, რომლის მეშვეობითაც ადრე მოსახლეობა აფხაზეთის ტერიტორიაზე თავისუფლად გადაადგილდებოდა. თვითმხილველების განცხადებით, რუსი მესაზღვრეები, გალისა და ოჩამჩირის ადმინისტრაციის წარმომადგენლებთან ერთად, საფეხმავლო გადასასვლელებთან ჩასაფრდნენ.

დღის განმავლობაში, 4 საათის შემდეგ, ოკუპანტებმა რამდენიმე მოქალაქე დააკავეს და მათ, როგორც "საზღვრის დამრღვევებს" ჯარიმის სახით 200 ლარის ექვივალენტი რუსული რუბლის გადახდა აიძულეს. რამოდენიმე მათგანს, მობილური ტელეფონიც წაართვეს, იმ მოტივით, რომ ისინი საქართველოს ტერიტორიაზე მოქმედ მობილურ ქსელებში იყვნენ ჩართულები.

იმ შემთხვევაში, თუ რომელიმე მოქალაქე მსგავს "დარღვევაში" განმეორებით იყო შემჩნეული, ჯარიმის ოდენობა 500 ლარის ექვივალენტს აღწევდა. ასეთი ერთი შემთხვევა იქნა დაფიქსირებული. ოკუპანტების განცხადებით, თუ მოქალაქე ე.წ. აფხაზური ადმინისტრაციის რომელიმე უწყებაში იქნება დაფიქსირებული ჯარიმის სახით 800 ლარის ეკვივალეტი თანხის გადახდა მოუწევს.

ოკუპანტები და მარიონეტული რეჟიმის წარმომადგენლები აცხადებენ, რომ ეს პირველი რეიდია და მსგავს აქციებს ისინი კვლავაც გაიმეორებენ.