მანდატურის მიმართ სისხლის სამართლებრივი დევნა გაგრძელდება

მანდატურის მიმართ სისხლის სამართლებრივი დევნა გაგრძელდება - ჯეჯელავა იმერეთში მომხდარ ფაქტზე

პოლიტიკა - 14:11, 21 Jan, 2017

3509

იმერეთის რეგიონში მომხდარ ფაქტთან დაკავშირებით, რომელიც მანდატურსა და სკოლის მოსწავლეს შორის სქესობრივ კავშირს უკავშირდება, კომენტარი გააკეთა განათლების მინისტრმა. ალექსანდრე ჯეჯელავას განცხადებით, მომხდარმა ჩრდილი არ უნდა მიაყენოს მანდატურის სამსახურს და მის მიმართ ნდობა არ უნდა დაიკარგოს. ჯეჯელავას თქმით, მანდტურის სამსახურმა სკოლები ბევრ უბედურებას ააცილა და ის ერთ-ერთი საამაყო სამსახურია, რომელიც წინა ხელისუფლების დროს შეიქმნა და დღემდე წარმატებით ფუნქციონირებს.

მინისტრის თქმით, მომხდარ ფაქტთან მიმართებაში სისხლის სამართლის კოდექსს ცოლად მოყვანა-არმოყვანა არ აინტერესებს და ამიტომ, ჯეჯელავას განცხადებით, სისხლის სამართლებრივი დევნა გაგრძელდება.

„მანდატურების დანიშვნის წესი პრინციპში ფუნდამენტურად ისეთივე რჩება, როგორიც აქამდე იყო. მანდატურის სამსახურმა ძალიან ბევრი უბედურება აგვაცილა. ძალადობა სკოლებში შემცირებულია. ეს ერთ-ერთი საამაყო სამსახურია, რომელიც ადრე შეიქმნა და ჩვენი ხელისუფლების პირობებში დაიხვეწა, გახდა უფრო ჰუმანური და დაუახლოვდა სკოლის ადმინისტრაციას. ცალკეული შემთხვევები, რა თქმა უნდა, ნებისმიერ სისტემაშია. პროფესიის გამო, ნდობა არ უნდა შეილახოს“ - აცხადებს მინისტრი.

ჯეჯელავას განმარტებით, აღნიშნული პირი სისტემაში აღარ მუშაობს, თუმცა მისი თქმით, მეორე პრობელმაა თავად საზოგადოების ტოლერანტული დამოკიდებულება ადრეული ქორწინების მიმართ, რაც კარგი არ არის.

,,ჩვენ, განათლებით, ოჯახებთან და საზოგადოებასთან მუშობით უნდა შევეცადოთ, რომ დავანახოთ მიუღებელია ასეთ ადრეულ ასაკში ქორწინება, მისი ხელშეწყობა თუნდაც ოჯახის მხრიდან. მარწმუნებენ, რომ ყველა ბედნიერია ამ კონკრეტულ შემთხვევაში, თუმცა ჩვენ ნამდვილად არა ვართ ბედნიერი“ - განაცხადა ალექსანდრე ჯეჯელავამ.

იმერეთის რეგიონის ერთ-ერთ მუნიციპალიტეტში, მანდატურმა სკოლის მოსწავლე გააუპატიურა. ადგილობრივების განცხადებით, ეჭვმიტანილი 40 წლის მამაკაცია და რამდენიმე წელია სკოლაში მუშაობს, დაზარალებული კი 15 წლისაა და ამ სკოლაში ერთი წლის წინ გადავიდა.

როგორც „ნიუპოსტს“ შინაგან საქმეთა სამინისტროს პრესსამსახურში განუცხადეს, საქმეზე გამოძიება საქართველოს სისხლის სამართლის კოდექსის 140-ე მუხლით მიმდინარეობს, რაც სქესობრივ კავშირს ან სექსუალურ სხვაგვარ მოქედებას გულისხმობს 16 წლის ასაკს მიუღწეველთან. აღნიშნული მუხლი 7-დან 9 წლამდე თავისუფლების აღკვეთას ითვალისწინებს.