სპორტის სასახლეში ამ წუთებში „ნაციონალური მოძრაობის“ ყრილობა მიმდინარეობს, რომლის ფარგლებშიც დამსწრე საზოგადოებას სიტყვით რომან გოცირიძემ ისაუბრა და ქვეყნის ეკონომიკურ მდგომარეობას გაუსვა ხაზი:

„ეს არის ახალი საქართველო, რომელიც შექმნა ამ დარბაზში დამსწრე საზოგადოებამ, ეს არის საქართველო რომელსაც საფუძველი ჩაუყარა ნაციონალურმა მოძრაობამ, სამარცხვინოა და ხელისუფლების დანაშაულია ის, რომ ამ წარმატების სულის ჩამდგმელი ახლა ათასობით კილომეტრობით დაშორებული სკაიპთან ზის და უყურებს ამ დარბაზს. მოგესალმებით მიშა, ვიცი რომ ახლა შენ ჩვენთან ხარ, ჩვენც თქვენთან ვართ.

ამ მთავრობამ საქართველო კრიზისში შეიყვანა, 2003 წელს საქართველოს მთლიანი შიდა პროდუქტი 4 მილიარდი დოლარი იყო, 2014 წელს 14 მილიარდი გახდა, ოცნების ხელისუფლებამ ქვეყნის ეკონომიკა 3 მილიარდით შეამცირა, ქვეყანა წავიდა უკან, დოლარებში რატომ თვლითო იკითხავენ, რატომ წამოიწყეს მაშინ სულელური დედოლარიზაცია? ეკონომიკური დაღმასვლა დაეტყო ყველა ოჯახს. მძიმე 4 წელი გამოვიარეთ“, - განაცხადა რომან გოცირიძემ.