,,საკონსტიტუციო ხედვა საკმაოდ კარგია, თუმცა გაუმჯობესებაც კარგი იქნებოდა"

,,საკონსტიტუციო ხედვა საკმაოდ კარგია, თუმცა გაუმჯობესებაც კარგი იქნებოდა" - ჯანი ბუკიკიო

პოლიტიკა - 13:08, 20 Jan, 2017

1828

ვენეციის კომისიის დელეგაცია თბილისში გვიან ღამით ჩამოვიდა. დელეგაციამ რომელსაც ჯანი ბუკიკიო ხელმძღვანელობს შეხვედრები დილიდან დაიწყო. განხილვის მთავარი თემა საკონსტიტუციო ცვლილებებია.

საკონსტიტუციო კომისიის ხელმძღვანელ, პარლამენტის თავმჯდომარესთან შეხვედრა მედიისთვის დახურული იყო.

ჯანი ბუკიკიომ არაოფიციალური შეხვედრა პარლამენტის ყოფილ თავმჯდომარესთანაც, როგორც შეხვედრის დასრულების შემდეგ ვენეციის კომისიის თავმჯდომარემ განაცხადა საკონსტიტუციო ხედვა საკმაოდ კარგია, თუმცა გაუმჯობესებაც კარგი იქნებოდა.

„შეხვედრაზე ბევრი საკითხი განვიხილეთ და მინდა აღვნიშნო, სამართლის საკითხებში ქართველ ექსპერტებთან ჩვენ სრული აზრთა თანხვედრა გვაქვს. ბევრ მათგანს უკვე წლებია ვიცნობ და მოხარული ვარ, რომ ვთანხმდებით იმ საკითხებში, რომელთა განხორციელებაც აუცილებელია თქვენს ქვეყანაში ვითარების გასაუმჯობესებლად. საკონსტიტუციო ხედვა საკმაოდ კარგია, თუმცა გაუმჯობესებაც კარგი იქნებოდა. შეხვედრა არ იყო დაანონსებული, რადგან ის ვიზიტის ოფიციალურ პროგრამაში არ არის შეტანილი. ვენეციის კომისიას კი სურს ჰქონდეს რეალური კონტაქტი საზოგადოების უშუალო ნაწილთან,“ - განაცხადა ვენეციის კომისიის პრეზიდენტმა, ჯანი ბუკიკიომ.

ვენეციის კომისიის თავმჯდომარესთან შეხვედრის შემდეგ საკონსტიტუციო კომისიის მუშაობასა და ცვლილებებზე კომენტარი დავით უსუფაშვილმაც გააკეთა. პარლამენტის ყოფილი თავმჯდომარე ამბობს, რომ საარჩევნო სისტემაში ცვლილებებისთვის კენჭისყრას მხოლოდ პოლიტიკური ნება სჭირდება.

„გასული წლის განმავლობაში აბსოლუტურად ყველა პოლიტიკურმა ძალამ, ვინც ჩართული იყო პროცესში, ყველა არასამთავრობო ორგანიზაციამ, ყველა ინსტიტუტმა, 2016 წლის არჩევნების შემდგომ მხარი დაუჭირა პროპორციული არჩევნების სისტემის შემოღებას. ეს ყველაფერი არის ოფიციალურად ინიცირებული, დევს პარლამენტში და სჭირდება კენჭისყრა. ერთადერთი მიზეზი, რატომაც ვერ ვუყარეთ კენჭი გასულ პარლამენტში, იყო ეს პოლიტიკური დაძაბულობა პარლამენტის შიგნით. დღეს ეს პრობლემა აღარ არის, ქართული ოცნება იყო პროპორციული სისტემის შემოღების ინიციატორთა შორის, ამიტომ ეს საკითხი თუ იქნებოდა კენჭისყრაზე უახლოეს კვირეებში დასმული და პარლამენტიც თუ მიიღებდა დადებით გადაწყვეტილებას, ეს იქნებოდა ძალიან მნიშვნელოვანი გზავნილი კონსტიტუციურ პროცესში ჩართული ყველა მხარისადმი, რომ ხელისუფლება განწყობილია კონსესუსების პატივისცემისკენ,“ - განაცხადა პარლამენტის ყოფილმა თავმჯდომარემ დავით უსუფაშვილმა.