"ხელშეკრულება "გაზპრომთან" ხალხისა და ქვეყნის ღალატია, პასუხი უნდა აგონ, მოუწევთ გადადგომა"

"ხელშეკრულება "გაზპრომთან" ხალხისა და ქვეყნის ღალატია, პასუხი უნდა აგონ, მოუწევთ გადადგომა" - ენმ რეზოლუციას ამზადებს

პოლიტიკა - 12:22, 19 Jan, 2017

2781

ოპოზიცია მთავრობის პასუხისმგებლობაზე საუბრობს. „ერთიანი ნაციონალური მოძრაობა“ პარლამენტში შესაბამის რეზოლუციას წარადგენს. ენმ-ში მიაჩნიათ, რომ ხელისუფლებამ პასუხი უნდა აგოს „გაზპრომთან“ გაფორმებული ხელშეკრულების გამო. პოლიტიკოსები ამ დოკუმენტის გასაჯაროებას მოითხოვენ.

„დღემდე არ ვიცით ეს ხელშეკრულება არსებობს თუ არ არსებობს. მთავრობის განცხადებით, მოხდა შეთანხმება, მაგრამ ჩვენ არ ვიცით ხელშეკრულებას მოეწერა ხელი თუ არა, იყო თუ არა მსჯელობა ამის თაობაზე საქართველოს მთავრობაში. ამ მოლაპარაკების სტატუსიც კი არ ვიცით თუ რა ეტაპზეა. ჩვენ მოვითხოვთ დაუყოვნებლივ ამ პროცესის შეჩერებას. ეს არის ქვეყნის ეროვნული ინტერესების საწინააღმდეგო ქმედება, ფაქტობრივად საქართველოს ხელისუფლებამ მოახდინა კაპიტულაცია რუსეთის წინაშე. იმ შემთხვევაშიც კი, როდესაც ჩვენ გვაქვს სერიოზული ბერკეტები, სადაც გვაქვს უპირატესობა, როდესაც მივდივართ ასეთ დათმობაზე, წარმოგვიდგენია თუ რა მოხდება უფრო მძიმე მოლაპარაკების შემთხვევაში. ეს ხელშეკრულება პოლიტიკურად არის დამაზარალებელი ქვეყნის ეროვნული ინტერესებისათვის, ეკონომიკურად ეს არის წამგებიანი. ჩვენ წელიწადში ვკარგავთ დაახლოებით 20 მილიონ დოლარს. იმ ხარჯების გათვალისწინებით, რასაც საქართველოს მხარე ეწევა ექსპლუატაციის მომსახურების სახით ამ მილისა და საკმაოდ დიდია ეს ხარჯები, ფაქტობრივად გამოდის, რომ ჩვენ ვმუშაობთ რუსეთისა და სომხეთისათვის. საქართველოს მთავრობამ უღალატა ხალხს და უღალატა ქვეყნის ინტერესებს, ამისათვის უნდა აგოს პასუხი, ამისათვის მთავრობას მოუწევს გადადგომა“, - განაცხადა რომან გოცირიძემ.

უცნობია როგორი იქნება მმართველი გუნდის პოზიცია ენმ-ს რეზოლუციასთან დაკავშირებით. „ნაციონალური მოძრაობა“ მიიჩნევს, რომ რეზოლუციას საპარლამენტო უმრავლესობის მხრიდან მხარდაჭერა ექნება.