"საინტერესო ოპონენტები სერიოზული წარმატებისათვის" - რა შემთხვევაში ითანამშრომლებს უსუფაშვილი ენმ-დან წასულებთან

პოლიტიკა - 11:43, 19 Jan, 2017

5514

„ერთიან ნაციონალურ მოძრაობაში“ განვითარებულ პროცესებს დავით უსუფაშვილი ბუნებრივ მოვლენას უწოდებს და აცხადებს, რომ შიდა კონფლიქტების არსებობის მიუხედავად ენმ-ს ერთიანობის შენარჩუნება აქამდე ხელოვნურად ხდებოდა. ამის შესახებ დავით უსუფაშვილმა ”პალიტრანიუსის” გადაცემაში ”360 გრადუსი” განაცხადა.

„2016 წლის საპარლამენტო არჩევნების შემდეგ რაც მოხდა ეს არ უნდა დავინახოთ მხოლოდ არჩევნების შემდგომ მოვლენად, ეს 2012-2016 წლების ერთობლივი შედეგია. სამწუხაროდ ეს ჯერ კიდევ ბუნებრივია ამ ქვეყნისთვის. ბუნებრივი არის ის რაც ახლა ხდება ნაციონალებში, ხელოვნური იყო ის რაც მანამდე ხდებოდა. 4 წელი ეს პროცესი ხელოვნურად იყო შეკავებული, ამ შეკავების პროცესში არა მარტო ნაციონალების, არამედ ოცნების წვლილიც იყო. იმიტომ რომ ეს გუნდი იმ სახით როგორიც ისინი 2016 წლის არჩევნებზე გავიდნენ იყვნენ გაცილებით ადვილად დასამარცხებელი ხელმეორედ ოცნების მიერ. თუკი ნაციონალები ის რაც ახლა ხდება 2012-2013 წლებში შეძლებდნენ, შეიძლებოდა გაცილებით მეტი გავლენები მოეპოვებინათ. შიდა კონფლიქტების მიუხედავად ამ გუნდის ერთად დატოვებით ხდებოდა ოცნების საარჩევნო ამოცანის შესრულება. სააკაშვილის საფრთხობელად წარმოჩენამ, მისივე სერიოზული მონაწილეობით ამ როლში, განაპირობა ის რომ ოცნებას ხელმეორედ მიეცა საშუალება საზოგადოების უმრავლესობისთვის მიუღებელ ძალასთან შერკინების. ჩაფიქრებული იქნა 2012 წლის ბრძოლის მინი-იმიტაცია,“- განაცხადა დავით უსუფაშვილმა.

„რესპუბლიკელებიდან“ წამოსული დავით უსუფაშვილი „ნაციონალებიდან“ წამოსულებთან თანამშრომლობას არ გამორიცხავს. უსუფაშვილის განცხადებით პოლიტიკურ ძალებს უნდა ჰქონდეთ ერთად დასხდომის და საკითხის ერთად გადაწყვეტის უნარი. მისი თქმით, თუ ნაციონალებიდან წამოსულებს ამიში უნარი აღმოაჩნდებათ, ის მოხარული იქნება, რადგან პოლიტიკურ რინგზე ღირსეული მოწინააღმდეგეები ეყოლება:

„მე ვიცი, რომ პოლიტიკური გუნდი, რომლის ფორმირების პროცესში მეც ვმონაწილეობ, ჩართული იქნება ქართულ პოლიტიკურ სივრცეში კონკურენციაში ყველასთან, ვისაც ამის სურვილი ექნება და ”ნაციონალური მოძრაობიდან” წამოსულ პირებს აშკარად აქვთ ამის სურვილი. რეალობაში ჩემთვის ”ნაციონალური მოძრაობიდან” წამოსული ადამიანები იქნებიან საკმაოდ საინტერესო ოპონენტები, რომლებთან კონკურენციაშიც სერიოზული წარმატების მიღწევისთვის ვიზრუნებ. დანარჩენი, ვის რა ბედი ელის, ეს გადამწყვეტი იქნება არჩევნებზე და ეს ამომრჩევლის გადასაწყვეტია. ჩემთვის ეს გუნდი არის ერთი-ერთი საინტერესო ოპონენტი ქართულ პოლიტიკურ სივრცეში. მე მათი ხედვებს, მიზნებს თუ პოლიტიკურ ამოცანებს 2004 წლის ივნისში გავემიჯნე. თუ რამე საკითხს გადაიაზრებენ, უკეთ ჩამოყალიბდებიან თემებზე, სახელმწიფოს როლზე თუ კანონის უზენაესობაზე, ეს მხოლოდ კარგი იქნება. ქართულ პოლიტიკურ სივრცეს სჭირდება არა ვინმე მორიგი „გადამრჩენი ქვეყნის“, არამედ სჭირდება პოლიტიკურ პროცესში ჩართული პარტიები, რომლებსაც აქვთ უნარი ერთმანეთთან მკვეთრი დაპირისპირების, დებატების, მაგრამ ასევე აქვთ უნარი ერთმანეთთან თანამშრომლობის, ამ ქვეყნის წინ წასაყვანად. მხოლოდ დებატები და ოპონირება არაა პოლიტიკური პარტიების ამოცანა, ესენი არ არიან რინგზე გამოყვანილი სპორტსმენები, რომლებმაც ერთმანეთი უნდა დაამარცხონ. ქვეყანაში პოლიტიკურ პროცესს სჭირდება ის, რომ ამ რინგის გარდა სათანამშრომლო მრგვალი მაგიდა იყოს. პოლიტიკურ ძალებს უნდა ქონდეთ ერთად დასხდომის დ საკითხის ერთად გადაწყვეტის უნარი. აი ამისი უნარები თუ აღმოაჩნდებათ „ნაციონალებიდან“ წამოსულ ადამიანებს ვნახოთ. მე ვიცი რომ დავით უსუფაშვილს აქვს ამისი უნარი და ამას გააკეთებს, თუ სხვებიც გააკეთებენ მოხარული ვიქნები, იმიტომ რომ პოლიტიკურ რინგზე მეყოლება ღირსეული მოწინააღმდეგეები.” - განაცხადა დავით უსუფაშვილმა.