"გაზპრომის" ხელშეკრულება - "არ უნდა ეს არაკვალიფიციური და უარგუმენტო განცხადებები"- კალაძე პრეზიდენტის წინააღმდეგ

პოლიტიკა - 20:48, 18 Jan, 2017

2856

ენერგეტიკის მინისტრი კახა კალაძე დღეს გამართულ ბრიფინგზე გაზპრომის ხელშეკრულების საკითხზე საქართველოს პრეზიდენტის პრესსპიკერის გუშინ გააკეთებულ იმ განცხადებას გამოეხმაურა, რომლის მიხედვითაც ხელშეკრულების ხელმოწერით ენერგოსექტორში მდგომარეობა გაუარესდა.
”რაც შეეხება პრეზიდენტს, მას აქვს იმის ფუფუნება და შესაძლებლობა, რომ მოითხოვოს ამ ხელშეკრულების დეტალები, მას აქვს წვდომა და არ უნდა ეს არაკვალიფიციური და უარგუმენტო განცხადებები, რასაც ბოლო დღეების განმავლობაში ვისმენთ და ეს სამწუხაროა. საკმარისად ვილაპარაკე პრეზიდენტზე და არასამთავრობო ორგანიზაციებზე, არაფრით განსხვავდებიან ერთმანეთისგან” - აღნიშნა კალაძემ.
მინისტრს ჟურნალისტებმა ოპოზიციის მიერ პარლამენტში მისი დაბარების შესახებაც ჰკითხეს.
კალაძე ამბობს, რომ მზად არის, უმრავლესობის დეპუტატების დაინტერესების შემთხვევაში, პარლამენტში მივიდეს.

”ზოგადად, რაც შეეხება ოპოზიციის განცხადებებს, ვინ არიან ეს ადამიანები? ისინი არიან ”ნაციონალური მოძრაობის” წევრები, ადამიანები, რომლებმაც 2008 წელს ჩვენი ტერიტორიების დიდი ნაწილი ჩააბარეს რუსეთს თავისი გაუაზრებელი პოლიტიკით და დღეს გამოდიან და ჩვენს ხელისუფლებაზე ამბობებნ, რომ გაფორმებული ხელშეკრულება არის ღალატი. აბსოლუტურად მიუღებელია ამ ადამიანების მხრიდან ეს განცხადებები. თუ უმრავლესობის დეპუტატებს ექნებათ სურვილი იმისა, რომ უფრო დეტალებში მიიღონ ინფორმაცია ამ კონკრეტულ ხელშეკრულებასთან დაკავშირებით, მე მზად ვარ მივიდე ჩემი გუნდით, მოადგილეებით და მივაწოდოთ დეტალური ინფორმაცია” - განაცხადა კალაძემ.