"უგულავა ციხეში შევიდა გატუტუცებული და უზრდელი, იქიდან კი დაბრძენებული იერით, მშვიდი ტონით, ჯანმრთელი გამოვიდა"

"უგულავა ციხეში შევიდა გატუტუცებული და უზრდელი, იქიდან კი დაბრძენებული იერით, მშვიდი ტონით, ჯანმრთელი გამოვიდა" - ქანთარია

პოლიტიკა - 16:24, 18 Jan, 2017

10985

საპარლამენტო უმრავლესობის წევრმა ნუკრი ქანთარია თვლის, რომ იმის მიუხედავად, რომ „გიგი უგულავამ ნაწილობრივ აღიარა რაღაცები“, „ნაციონალური მოძრაობის“ გაყოფის შედეგად შექმნილი ორი ბანაკიდან ის მაინც „ყველაზე დიდი წონისაა“.
"გიგი უგულავა როცა ციხეში შევიდა, ფაქტობრივად იყო გატუტუცებული და მაქსიმალურად უზრდელი, იქიდან გამოვიდა დაბრძენებული იერით, მშვიდი ტონალობით, დამშვიდებული, ჯანმრთელი, - ასე შეაფასა "ქართული ოცნების" წევრმა თბილისის ყოფილი მერის ციხიდან გათავისუფლება.

ნუკრი ქანთარიას თქმით, გიგი უგულავა ციხიდან ჯანსაღი გამოვიდა, რადგან ძალიან კარგ პირობებში იმყოფებოდა.
"ამბობს, პოლიტპატიმარი ვარო, კი აღიარა რაღაცები, მაგრამ იმდენადაც არა და ესეც გარკვეულად ხელს უწყობს. გიგი უგულავა ამ ორ ბანაკში ყველაზე დიდი წონისაა, მაგრამ ერთია, რომ „ნაციონალური მოძრაობის“ იმ ფანატიკური წრისთვის, რომელიც მიხეილ სააკაშვილზეა გაგიჟებული, უგულავას ფლანგი მოღალატეები არიან. უგულავას წამოაძახებენ, რომ ბიძინა ივანიშვილის პროექტია, ესენი მოინდომებენ პასუხს - ასე არა ვართო და დაიწყებენ ბიძინას ლანძღვას, ეს იქნება გაჯიბრება ერთმანეთთან.... ტყავის გამოცვლას უფრო ჰგავს ეს ყველაფერი. არიან ბუნებაში ისეთი არსებები, რომლებიც დროდადრო იცვლიან კანს, მაგრამ არსით, შინაგანად, რჩებიან იგივენი. მგონია, რომ ესენიც იგივენი არიან ბუნებით და მხოლოდ გარეგნულად შეიცვალეს სახე იმიტომ, რომ ვერ შეეწყნენ იმ მდგომარეობას და კონფლიქტი მოუვიდათ ბელადთან. ისინი ახალი ფიგურის წამოწევას შეეცდებიან და უგულავა ცდილობს ეს ფიგურა თვითონ იყოს“, - აღნიშნა ნუკრი ქანთარიამ.