"ეს არის წითელი ხაზი, ხელისუფლება ადასტურებს, რომ რუსული ინტერესები ამოძრავებს"- კორძაია "გაზპრომთან" ხელშეკრულებაზე

პოლიტიკა - 14:56, 18 Jan, 2017

1580

დღეს გამართულ პრესკონფერენციაზე „რესპუბლიკური პარტიის“ ერთ-ერთმა ლიდერმა თამარ კორძაიამ „გაზპრომთან“ დადებული ხელშეკრულების შესახებ ისაუბრა და ის საქართველოს სუვერენიტეტის გასხვისების დასაწყისად შეაფასა. კორძაიას თქმით ამით დასტურდება ის რომ ხელისუფლებას რუსული ინტერესები ამოძრავებს:

„რესპუბლიკური პარტიისთვის“ გაზპრომის თემა არაა რიგითი თემა, ჩვენ ყოველთვის ვაქცევთ ყურადღებას გაზპრომთან მოლაპარაკებების თემებს. მე შეგახსენებთ, იმ პასუხს, რომელიც 2015 წლის დეკემბერში მოგვწერა ენერგეტიკის სამინისტრომ, ჩვენ ძალიან ბევრი შეკითხვა დავსვით ამასთან დაკავშირებით. მნიშვნელოვანია ის, რომ პროცესი არის გაუმჭვირვალე და ხელისუფლება არ გრძნობს ანგარიშვალდებულებას საზოგადოების წინაშე. რესპუბლიკელები ამ პროცესს ვაფასებთ, როგორც ქვეყნის სუვერენიტეტის გასხვისების დასაწყისს, იმიტომ რომ ერთია რუსეთის აგრესიული დამოკიდებულება გაზის ფასის მიმართ და როდის გაზრდის არ ვიცით და მეორეა ჩვენი პოლიტიკური ფასის დაკნინება. რუსეთს აბსოლუტურად ყველა ბერკეტი გადავეცით. არავინ არ გვიხსნის როგორ შეეძლო რუსეთს სომხეთისთვის ალტერნატიული გზით გაზის მიწოდება. არ შეეძლო და დაგვისაბუთონ. რატომ არ ვაწარმოებდით და საერთოდ ვაწარმოებდით თუ არა ირანთან მოლაპარაკებას და ა.შ. ჩვენ ვფიქრობთ, რომ ამ ხელშეკრულების დადებით საქართველომ თავისი გეოპოლიტიკური ფასი სულ მცირე შეამცირა და დაკარგა. ეს არის წითელი ხაზი, სადაც ეს ხელისუფლება ადასტურებს იმას, რომ მას რუსული ინტერესები ამოძრავებს, რაც ეწინააღმდეგება საქართველოს მოსახლეობის უმეტესობის ნებას“- განაცხადა თამარ კორძაიამ.