პარლამენტის თავმჯდომარის პირველმა მოადგილემ, თამარ ჩუგოშვილმა საქართველოში თურქეთის რესპუბლიკის საგანგებო და სრულუფლებიან ელჩთან, ზექი ლევენთ გურმუქჩუსთან შეხვედრა გამართა.

მხარეებმა ისაუბრეს ორი ქვეყნის პარლამენტებს შორის თანამშრომლობაზე და მისი გაღრმავების პერსპექტივებზე, მათ შორის, მეგობრობის ჯგუფების ფორმატის ფარგლებში. შეხვედრაზე განხილული იყო ასევე, ევროსაბჭოს საპარლამენტო ასამბლეაში ორი ქვეყნის საპარლამენტო დელეგაციების თანამშრომლობის საკითხები.

როგორც შეხვედრის დასრულების შემდეგ პარლამენტის თავმჯდომარის პირველმა მოადგილემ, თამარ ჩუგოშვილმა განაცხადა, შეხვედრა იყო ძალიან საქმიანი, მეგობრული და პარტნიორული.

„საუბარი ძირითადად შეეხებოდა პარლამენტებს შორის ურთიერთობების გაღრმავებას, მეგობრობის ჯგუფების გააქტიურებას როგორც თურქეთის, ასევე საქართველოს პარლამენტის მხრიდან და ორმხრივი ურთიერთობების ხელშეწყობას საპარლამენტთაშორისო თანამშრომლობის კუთხით. შეხვედრაზე, ასევე ვისაუბრეთ ევროსაბჭოს საპარლამენტო ასამბლეაში ჩვენს დელეგაციებს შორის თანამშრომლობის გააქტიურებაზე და ზოგადად, მრავალმხრივ ფორმატებში საპარლამენტო დელეგაციების მეშვეობით ჩვენ შორის ურთიერთობების გარღმავებაზე ისეთ საკითხებთან დაკავშირებით, რომელიც ორივე ქვეყნისთვის პრიორიტეტია, მაგალითად, ევროინტეგრაციის კუთხით, რაშიც მთავარი თანხვედრა გვაქვს ჩვენს საგარეო პრიორიტეტებში“, - განაცხადა თამარ ჩუგოშვილმა.