საგარეო ურთიერთობათა კომიტეტის თავმჯდომარე, სოფიო ქაცარავა საქართველოში ნატო-ს სამეკავშირეო ოფისის ხელმძღვანელს, უილიამ ლაჰიუს შეხვდა.

შეხვედრაზე მხარეებმა საქართველოს ნატო-ში ინტეგრაციის პროცესის მიმდინარეობა განიხილეს. ასევე, ისაუბრეს დაგეგმილი ვიზიტებისა და ღონისძიებების შესახებ და თანამშრომლობის კონკრეტული გეგმა დასახეს. მხარეებმა სტრატეგიული კომუნიკაციის მნიშვნელობის შესახებ და ამ მიმართულებით უკვე არსებულ შედეგებსა და პროგრესზე ისაუბრეს. „გაცნობითი ხასიათის შეხვედრაზე ვისაუბრეთ ნატო-ს მიერ დაგეგმილ ღონისძიებებზე საქართველოში, პარლამენტის მონაწილეობასა და მომავალში კონკრეტულ ურთიერთთანამშრომლობაზე. მათ შორის, ნატოს საპარლამენტო ასამბლეასთან დაკავშირებით, რომელიც საქართველოში მაისში გაიმართება“, - განაცხადა სოფიო ქაცარავამ.