„დავით ბაქრაძეს ვუთვლიდი ციხიდან, ჩადი და დაელაპარაკე მიშას-მეთქი, მაგრამ მისგან იყო ყრუ კედელი“ - დედაქალაქის ყოფილი მერი გიგი უგულავა „ნაციონალურ მოძრაობაში“ მიმდინარე მოვლენებზე საუბრობს. უგულავას თქმით, პარტიის გაყოფის პასუხისმგებლობას მიხეილ სააკაშვილს აკისრებს და მისივე განცხადებით, საქართველოს მესამე პრეზიდენტს აღნიშნული პროცესის შეჩერება შეეძლო:

„მე გაბრაზებული არ ვარ მიშაზე, ერთ ნაწილს თუ არ ჩავთვლით, პარტიის დანგრევის პასუხისმგებლობა მასზეა. ის რაც მოხდა პარტიის დანგრევაა, თუ სირაქლემასავით ვიტყვით, რომ მცირე ჯგუფმა დატოვა, კიბატონო. მას ლიდერობაში არავინ ეცილებოდა, ამიტომ ვაკისრებ მას პასუხისმგებლობას. თუ თანაცხოვრება შეუძლებელია, წარსული ბრძოლა, გამოცდილება, ამომრჩეველი, რომელიც გვიყურებს, სასაცილოდ გამოიყურებოდა ეს ყველაფერი. გამწვავებაზე წამოვიდა მიშა, რომელმაც ფუნდამენტურად არასწორი მოთხოვნა დააყენა, პარლამენტში არშესვლა. ეს იყო პირველი წყალგამყოფი, რომელმაც სხვა პანდორას ყუთი გახსნა. როდესაც შენი პარტიის ლიდერი დააბრალებს თანაპარტიელებს, რომ ივანიშვილთან გარიგებულები არიან, ნიაღვარი წამოვიდა და ვეღარ გაჩერდა, მაშინვე დაიწყო ამაზე საუბარი. მიხეილ სააკაშვილს სულ მცირე ამის შეჩერება შეეძლო, პარტიაში ყველა ფლანგმა იცის, რომ ამის პირველი ბიძგი სამწუხაროდ მისგან წამოვიდა. დავით ბაქრაძესაც ვუთვლიდი ციხიდან, ჩადი და დაელაპარაკე-მეთქი, მაგრამ მისგან იყო ყრუ კედელი. მისგან იყო მყარი გადაწყვეტილება, მას პრინციპულად არ უნდოდა ის სტატუს ქვო პარტიაში, რაც 2013 წლიდან დაინერგა, ანუ კოლექტიური გადაწყვეტილებები“, - განაცხადა გიგი უგულავამ.