"არავინ არაა სხვაზე ნაკლები პატრიოტი"- უმრავლესობა კალაძის პარლამენტში მისვლის საჭიროებას ვერ ხედავს

პოლიტიკა - 16:07, 17 Jan, 2017

2778

მმართველი გუნდის წევრები „გაზპრომთან“ დაკავშირებით ოპოზიციის მხრიდან წამოსულ კრიტიკას პასუხობენ. „ქართული ოცნების“ წარმომადგენლების თქმით, ხელისუფლებამ გაზპრომთან დაკავშირებით შეკითხვებს უკვე უპასუხა და ამიტომ, ენერგეტიკის მინისტრის პარლამენტში მისვლის აუცილებლობა არ არსებობს:

„საჭირო არ არის ეს შეხვედრა, იმიტომ რომ რაც თქვა კალაძემ, იმის მეტს არაფერს არ იტყვის. ყოველ შემთხვევაში კალაძემ, მისმა მოადგილემ, ეკონომიკისა და ფინანსთა მინისტრებმა განაცხადეს, რომ მიღწეულია საუკეთესო ვარიანტი, რისი მიღწევაც შეიძლებოდა და სხვაობა ეკონომიკური თვალსაზრისით დიდი არ არის ძველ ვარიანტთან შედარებით.“- განაცხადა პარლამენტის დარგობრივი ეკონომიკისა და ეკონომიკური კომიტეტის თავმჯდომარის მოადგილე რევაზ არველაძემ.

ენერგეტიკის მინისტრის პარლამენტში დაბარების აუცილებლობას ვერ ხედავს გია ვოლსკიც. მისთვის გაუგებარია რა ალტერნატივას სთავაზობდა ოპოზიცია კალაძეს:

„ჩვენ პრაქტიკულად გვთავაზობდნენ, რომ აღარ დაგვრჩენოდა არც სატრანზიტო ფუნქცია, არც გაზი და არც თანხა. მაგის ალტერნატივა არის ის რომ დაჯდე მოლაპარაკების მაგიდასთან, მუშტი დაუბრახუნო რუსეთს და უნდა უთხრა, რომ არ გაბედო მონეტარიზაციაზე არ გადახვიდე, თორემ, მრავალიწერტილი. იმას შეეშინდება და გეტყვის კი ბატონო შეიძლება 10 კი არა 15%-იც მოგცე, ოღონდ თქვენ არ გამიბრაზდეთ. აი ეს არის ალტერნატივა. ამასთან დაკავშირებით იბარებენ კახა კალაძეს“- განაცხადა გია ვოლსკიმ.

გუგული მაღრაძის განცხადებით რუსეთი საკმაოდ რთული პარტნიორია და ამ პირობებში მიღწეული შეთანხმება დადებითია:

„არავინ არაა სხვაზე ნაკლები პატრიოტი. ჩვენ წლების განმავლობაში ვცდილობდით შეგვენარჩუნებინა ნატურით გადახდა, მაგრამ რუსეთი არის საკმაოდ რთული პარტნიორი და თუკი ის არ თანხმდება გარკვეულ პირობებზე, ხანდახან არ არის სხვა გზა, ის რომ ძალიან მაღალი ტარიფით იქნება გადახდა ეს ძალიან დადებითია.“- განაცხადა გუგული მაღრაძემ.