"მე ვფიქრობ არა იმათზე ვინც წავიდა, არამედ იმათზე ვინც მოვა"- სააკაშვილი

პოლიტიკა - 22:23, 16 Jan, 2017

1832

მიხეილ სააკაშვილის თქმით „ერთიანი ნაციონალური მოძრაობიდან“ რამდენიმე ჯგუფის გასვლა ფინანსურ ინტერესებთან იყო კავშირში. ბოლო ჯგუფის გასვლასთან დაკავშირებით კი სააკაშვილი აცხადებს, რომ ამ ჯგუფს სურდა „ქართული ოცნებისთვის“ ეჩვენებინა, რომ სააკაშვილისგან განსხვავებით მათთან ლაპარაკი შესაძლებელია:

„ივანიშვილმა ყველაფერი გათვალა, პარტიის ლიდერშიპის უმეტესი ნაწილი ამ სცენარს მიჰყვებოდა სხვადასხვა მოტივაციით. ხალხი სულელი ხომ არაა, ყველაფერი ნათელია. ეს არ განხორციელდა იმის გამო რომ ივანიშვილმა არ გაითვალისწინა ათეულობით ათასი გულანთებული პატრიოტი, რომლებმაც განაცხადეს, რომ ისინი იყვნენ მთავარი და არა კაბინეტებში მყოფი ხალხი. ეს იმაზე კი არაა საუბარი, რომ ისინი მიშას მიჰყვებიან და ბელადმანებს უძახიან, თუ დასჭირდათ მიშასაც გასწევენ გვერდზე. სწორედ ეს ხალხია ძალიან განათლებული, შეიძლება მარიფათი არ აქვთ ზოგიერთებივით, ზოგის თვალში ჭკვიანი ისაა, ვინც ქიციც იცის და ქიცმაცურიც, ყველაზე მეტად რა გამოთქმასაც ვერ ვიტან. მე არ ვიცი ქიციც და ქიცმაცურიც და ამ ხალხმაც არ იცის. მათ იციან იდეა. ოლიგარქის ფულს მხოლოდ იდეა და იდეალისტები დამარცხებენ. ჩვენ მას ფულით, ვერაგობით და ცბიერებით ვერ მოვუგებთ. პარტიაში რჩებიან იდეალისტები, ვინც წავიდა ზოგი ჩამოიშალა, ზოგი დაიღალა, ზოგი გაიყიდა კიდეც.“- განაცხადა მიხეილ სააკაშვილმა.

სააკაშვილის თქმით მისთვის მთავარი არიან არა ის ადამიანები ვინც წავიდა, არამედ ისინი ვინც ნაციონალურ მოძრაობას და მის იდეას მომავალში შეუერთდება.

„ბევრად მეტად ვფიქრობ იმაზე კი არა, ვინც წავიდა, არამედ ბევრად მეტად ვფიქრობ იმაზე, ვინც მოვა, დიდი ამბებია წინ,“- განაცხადა მიხეილ სააკაშვილმა.

მიხეილ სააკაშვილის თქმით, ქართველების ახალი თაობა იქნება ნაციონალური მოძრაობის მოკავშირე.

„ნაციონალური მოძრაობა ივლის წინ გამარჯვებისკენ სწრაფი ტემპით, გამარჯვების გზა გადის ივანიშვილის დამარცხებაზე,“- აღნიშნა სააკაშვილმა.