"ხელისუფლებამ ვერ განახორციელა შესაბამისი საინფორმაციო კამპანია, იმ მიმართულებით, რომ მოსახლეობისთვის აეხსნა, რატომ არის საქართველოსთვის NATO-სა და ევროკავშირში გაწევრიანება ძალიან მნიშვნელოვანი. მოსახლეობის დიდი ნაწილისთვის NATO სამხედრო ბლოკთან ასოცირდება და რადგან ჩვენი მოსახლეობის დიდი ნაწილი სოფლის მეურნეობაშია დასაქმებული ისინი თვლიან, რომ თუ საქართველო ალიანსში გაწევრიანდება, ამით მათი შემოსავალი არ მოიმატებს. მოსახლეობას უნდა ავუხსნათ, რომ NATO-ში გაწევრიანება უსაფრთხოების გარანტია, რაც თავის მხრივ საფუძველია ქვეყნის სოციალურ-ეკონომიკური განვითარების"- აღნიშნა "ნიუპოსტთან" ექსპერტმა.

ჩიტაძის განცხადებით, ამის პარალელურად NATO-სა და ევროკავშირის საწინააღმდეგო კამპანიას რუსეთი აქტიურად ატარებს.

"რუსული ძალები საუბრობენ იმაზე, რომ რადგან საქართველო ამდენი ხანია ვერ გახდა NATO-ს წევრი, აქედან გამომდინარე ნატოს საქართველო არ სჭირდება. იგივე ხდება ევროკავშირთან მიმართებით. არა და NATO და ევროკავშირი პატივს სცემს ჩვენი ქვეყნის დამოუკიდებლობასა და სუვერენიტეტს. ამიტომ ვამბობ, რომ ეს ინფორმაცია მოსახლეობას სწორად უნდა მიეწოდოს. რუსეთის პროპაგანდის სასარგებლოდ მუშაობს "ბრექსითის" შედეგებიც. ისინი გამუდმებით აპელირებენ, რომ ევროკავშირი იშლება. ეს ინფორმაციაც ტყუილია, რადგან ერთი ქვეყნის გამოყოფა, არ ნიშნავს დაშლას, თავის დროზე 6 ქვეყნისგან შედგებოდა ევროკავშირი. დღეს, ბრიტანეთის ჩათვლით 28 ქვეყანაა გაწევრიანებული. ბრიტანეთი თუ გადის, სხვა ქვეყანა ჩაანაცვლებს მას. მოკლედ NDI-ის შედეგები გამოწვეულია არასწორი საინფორმაციო პოლიტიკით. აუცილებელია, ეთნიკურად დასახლებულ რეგიონებში აქტიური პროპაგანდის ჩატარება"- დასძინა ჩიტაძემ.

NDI კვლევის ახალ შედეგებს აქვეყნებს. შეერთებული შტატების ეროვნულ-დემოკრატიულმა ინსტიტუტმა 4 ნოემბრიდან 4 დეკემბრამდე ჩატარებული გამოკითხვის მონაცემები გაასაჯაროვა.

კვლევამ აჩვენა, რომ შემცირებულია იმ ადამიანთა რიცხვი, ვისთვისაც მისაღებია საქართველოს მთავრობის გაცხადებული მიზანი, საქართველო გახდეს NATO-ს წევრი.

NDI-ის ცნობით, გამოკითხულთა 61% ამბობს, რომ მათთვის მისაღებია NATO-ში გაწევრიანება, ხოლო 25%-სთვის მიუღებელი. ამასთან, ქართული ოცნების შეხედულებებთან ახლოს მყოფთა 60%-ია NATO-ში გაწევრიანების მსურველი, ხოლო ენმ-ის შეხედულებებთან ახლოს მყოფთა - 79%.
ცნობისთვის, 2016 წლის ივლისში 64%-სთვის იყო მისაღები NATO-ს წევრობა, 2016 წლის მარტში კი, 68%-სთვის.

ამასთან გამოკითხული მოსახლეობის 72%-სთვის მისაღებია „მთავრობის გაცხადებული მიზანი საქართველო გახდეს ევროკავშირის წევრი“. დანარჩენი 18 პროცენტისთვის კი - მიუღებელი. ცნობისთვის, 2016 წლის მაისის გამოკითხვის შემდეგ ევროკავშირში გაწევრიანების მსურველთა რიცხვი შემცირებულია.