საგარეო კურსი და მძიმე ეკონომიკური პირობები - ენმ პასუხისმგებლობას ხელისუფლებას აკისრებს

პოლიტიკა - 13:54, 16 Jan, 2017

1588

"ნაციონალურ მოძრაობის" ერთ-ერთი ლიდერი თინათინ ბოკუჩავა აცხადებს, რომ მოქმედი ხელისუფლების მიერ რუსეთის მიმართ მაამებლურმა განცხადებებმა გამოიწვია ის, რომ NATO-სა და ევროკავშირში გაწევრიანების მსურველთა რიცხვი შემცირდა.

როგორც "ნიუპოსტს" ბოკუჩავამ განუცხადა, "ქართულ ოცნებას" სწორი ეკონომიკური პოლიტიკა არ გააჩნია.

„კვლევა ნათლად აჩვენებს სამწუხარო რეალობას, საქართველოს მოსახლეობისთვის უპირველეს პრობლემად, კვლავ უმუშევრობა და ეკონომიკური პრობლემები რჩება. ამ ფონზე კი ივანიშვილის ხელისუფლება მხოლოდ საკუთარ თავზე ზრუნავს. მოქმედი ხელისუფლების პირობებში, ქვეყანა კიდევ უფრო გაღარიბდება, რაც შეეხება საგარეო მიმართულებას, ვთვლი, რომ NDI-ის გამოკითხვის შედეგები, ივანიშვილის მთავრობის მავნებლური პოლიტიკის გამოძახილია. კვლევის მიხედვით შემცირებულია, ევროკავშირისა და "ნატოში" გაწევრიანების მსურველთა რაოდენობა, მაშინ როცა საქართველოს მოსახლეობა მოტივირებული იყო რაც შეიძლება მალე გამხდარიყო და ამ განწყობების ცვლილება მართლაც საგანგაშოა და ამაში დიდი წვლილი აქვს მოქმედ ხელისუფლებას, რომელიც პირდაპირ ახალისებს პრორუსულ ჯგუფებს და დევნის ქვეყნის მთავარ ოპოზიციურ ძალას, და ებრძვის ყველაზე პროდასავლური სარედაქციო პოლიტიკის მქონე, დამოუკიდებელ ტელეკომპანიას და მაამებლურ პოლიტიკას ატარებს რუსეთის მიმართ, ეს ყველაფერი იწვევს იმას, რომ ზოგიერთი ადამიანი უცხოვდება იმ დასავლური ოჯახისგან, სადაც გაერთიანებისთვის ჩვენი ქვეყანა დიდი ხანია იბრძვის"- უთხრა "ნიუპოსტს" თინათინ ბოკუჩავა.

NDI-ის კვლევის მიხედვით, NATO-ში გაწევრიანების მსურველთა რიცხვი შემცირდა, ამავე გამოკითხვამ აჩვენა, რომ ქვეყანაში ევროკავშირის წევრობის მოწინააღმდეგეთა რაოდენობა გაიზრდილია.