საკონსტიტუციო კომისიის სამუშაო ჯგუფები მუშაობას იწყებენ

საკონსტიტუციო კომისიის სამუშაო ჯგუფები მუშაობას იწყებენ - პირველი სხდომა 21 იანვარს გაიმართება

პოლიტიკა - 10:35, 16 Jan, 2017

1512

საკონსტიტუციო კომისიის შემადგენლობაში შემავალი სამუშაო ჯგუფების სხდომების თარიღი გარკვეულია. ადამიანის უფლებებსა და სასამართლოს რეფორმის საკითხებზე მომუშავე ჯგუფის სხდომა 21 იანვარს გაიმართება, დანარჩენი ჯგუფები კი 23, 27 და 28 იანვარს შეიკრიბებიან.
კომისიის შემადგენლობაში შემავალი სამოქალაქო სექტორის წარმომადგენლების განცხადებით, ერთ-ერთი პირველი და მნიშვნელოვანი საკითხი, რომელზეც ისინი ყურადღებას გაამახვილებენ საარჩევნო სისტემის ცვლილება იქნება.

მმართველი გუნდი ვარაუდობს, რომ საკონსტიტუციო კომისიის მუშაობა კონსტრუქციული და შედეგიანი იქნება და ცვლილებების შედეგად საზოგადოება მიიღებს კონსტიტუციას, რომელიც თაობებს მოემსახურება.

საპარლამენტო უმრავლესობის წევრის მარიამ ჯაშის თქმით, ისინი ელოდებიან რეკომენდაციებს, რომელიც იქნება დაფუძნებული ექსპერტულ შეფასებებზე:

„73 დარგის ექსპერტი, კონსტიტუციონალისტები მსჯელობენ არგუმენტებსა და კონტრარგუმენტებზე იმ ძირითადი გადაწყვეტილებების მიმართ, რომელიც ეხება როგორც პრეზიდენტის არჩევის, ასევე საარჩევნო სისტემის ცვლილებას. ჩვენ ველოდებით რეკომენდაციებს, რომელიც იქნება დაფუძნებული ექსპერტულ შეფასებებზე,“ - განაცხადა მარიამ ჯაშმა.