დღეს ოზურგეთში ექსპრემიერ, ბიძინა ივანიშვილის ხეების თხრის ინტენსიური სამუშაოები დაიწყო.

ოზურგეთის მუნიციპალიტეტის სოფელ ნატანებში, ყოფილი ჩაის ფაბრიკის ტერიტორიაზე, დღეს დილიდან, კომპანია "ზიმომ' ხეების თხრის მასიური სამუშაოები დაიწყო.

როგორც ჩვენი კორესპონდენტი ადგილიდან იუწყება, ტერიტორიაზე, რომელიც ადგილობრივი დეპუტატის, დავით სიხარულიძის განცხადებით, ეკონომნიკური განვითარების სამინისტროს კუთვნილებაა, დილიდან მობილიზებულია მძიმე ტექნიკა, ტრაქტორები, მაღალგამავლიანი თვითმცლელები, ამწე კრანი და 30-მდე მუშა პერსონალი.

არაოფიციალური ინფორმაციით, აღნიშნული ადგილიდან ივანიშვილს, შეკვეთილში არსებულ საკუთარ რეზიდენციის ეზოში 10-მდე ძირი ასწლოვანი ხე გადააქვს.

ადგილობრივები მიმდინარე სამუშაოებს აპროტესტებენ, თუმცა აცხადებენ, რომ პროტესტს აზრი არა აქვს რადგან ივანიშვილი ხალხის აზრს არ ითვალისწინებს.

თინა გობრონიძე, ადგილობრივი: "აბა რა გითხრათ, ათეული წლებია მაგ ხეებს ვუვლი, გვკითხა ვინმემ რამე? აინტერესებს ვინმეს ჩვენი აზრი? ძალიანაც მწყინს ეგ ამბავი"

დავით სიხარულიძე, ნატანების მაჟორიტარი ოზურგეთის მუნიციპალიტეტის საკრებულოში: "ეს ადგილი იყო გაპარტახებული და რატო უნდა ვიყო წინააღმდეგი? რა, ისევ ნატანებში გადააქვთ და თანაც უკეთეს ადგილას. ეს ეკონომიკური განვითარების სამინისტროს ბაზაზეა და ეტყობა სამინისტრომ აჩუქა"

სამუშაოებთან დაკავშირებით, ადგილზე კომენტარს არ აკეთებენ. ცნობილი მხოლოდ ის ხდება, რომ ასწლოვანი ხეების გადატანა ქვემო ნატანებიდან, სადაც ყოფილი ჩაის ფაბრიკის ტერიტორიაა, შეკვეთილში რამდენიმე დღეში მოხდება.