„ეს არის პროექტი, რომელიც კულტურისა და ხელოვნების თითქმის ყველა სფეროს მოიცავს და მიზნად ისახავს ამ ორი ქვეყნის ხალხთა მეგობრობას“ - ამბობს „ნიუპოსტთან“ საუბრისას ავსტრიაში მოღვაწე ქართველი ხელოვანი და მსახიობი მაია სასწრაფოშვილი.

სწორედ მისი ინიციატივით რამოდენიმე დღის წინ საფუძველი ჩაეყარა ორი ქვეყნის, საქართველო-ავსტრიის, კერძოდ კი ქალაქ ვენასა და ბათუმს შორის ურთიერთთანამშრომლობას კულტურისა და ხელოვნების სფეროში.

მოლაპარაკება ბათუმის კულტურისა და ხელოვნების ცენტრთან შედგა და სწორედ ამ ფაქტთან დაკავშირებით ოფიციალური დელეგაცია ბათუმიდან ეწვია ვენას, რის შედეგადაც ხელი მოეწერა ურთიერთთანამშრომლობის გრძელვადიან მემორანდუმს.

გიორგი მიქელაძე, ბათუმის მუსიკალური ცენტრის დირექტორი:

- ჩვენი ვიზიტის ძირითადი მიზანი და აზრი მემორანდუმი გახლდათ. ხელშეკრულება იმ ავსტრიულ-ქართულ თეატრთან გაფორმდა, რომლის პრეზიდენტიც ქალბატონი მაიაა. ის არის ხელოვანი, რომელსაც არანორმალურად უყვარს თავისი სამშობლო -საქართველო! გახლავთ თავიდან ბოლომდე ქართველი, რომელიც ვენაში ჩასულსაც კი თავს საქართველოში გაგრძნობინებს. საოცარი იყო ასევე ავსტრიაში, საქართველოს სრულუფლებიანი ელჩის ბატონი კოტე ზალდასტანაშვილის მიღება .

ბათუმის სახელმწიფო მუსიკალური ცენტრიდან გამომდინარე, ჩვენი ფორმატი კლასიკურ მუსიკას ითვალისწინებს,

მუსიკალური ცენტრი ეს არის საკმაოდ სერიოზული ორგანიზაცია, რომელიც დაახლოებით 360 თანამშრომელით არის დაკომპლექტებული. მუსიკალურმა ცენტრმა თავისი საქმიანობიდან გამომდინარე ფლაგმანობა იტვირთა კულტურისა და ხელოვნების დარგში.მაგრამ ამჯერად გავცდით ფორმატს და ამ პროექტის ფარგლებში კულტურისა და ხელოვნების სხვადასხვა დარგში უამრავი ღონისძიება ჩატარდება. ვენა არის ევროპის ცენტრი და ჩვენ გვსურს მაქსიმალურად ვაჩვენოთ ავსტრიელებს ის პოტენციალი რაც ბათუმს აქვს - საოპერო ხელოვნება იქნება ეს, ფოლკლორი თუ სხვა კიდევ მრავალი.... საუბარია მჭიდრო მეგობრულ ურთიერთობასა და გაცვლით პროექტებზე , აგრეთვე აქცენტი არის ტურიზმზე და უცხოელი ინვესტორების მოზიდვაზე კულტურის სფეროს მეშვეობით.

პირველი პროექტი ვენასა და ბათუმს შორის ჩვენი ინიციატივით უკვე მარტის თვეში. ეს იქნება ქალბატონი მაიას , როგორც მსახიობისა და ხელოვანის შემოქმედებითი საღამო ბათუმის მუსიკალურ ცენტრში. მასთან ერთად აგრეთვე ბათუმს ვენიდან სტუმრად ეწვევა მსოფლიოში აღიარებული არქიტექტორი ჰაიდულფ გერნგროსი, რომლის გამოფენაც ბათუმში აგვისტოში იგეგმება.

მაია სასწრაფოშვილი: „პროექტი ბათუმი-ვენა მიზნად ისახავს ორი კულტურისა და ამ ორი ქვეყნის ხალხთა მეგობრობას. დაგეგმილია უამრავი ღონისძიება. მათ შორის გაცვლითი პროგრამები, როგორც საოპერო ასევე თეატრალურ ხელოვნებაში, ფოლკლორული და კლასიკური მუსიკის საღამოები, ფესტივალები, მასტერკლასები ხელოვნების სხვადასხვა დარგში და რა თქმა უნდა გასსტროლები.

ბედნიერი ვარ, რომ ეს პროექტი შედგა და ამ ისტორიულ საქმეს ჩაეყარა საფუძველი.

რომ არა ასე ევროპულად მოაზროვნე და საქმეში მაღალ დონეზე კვალიფიცირებული წარმომადგენლები, როგორიც გახლავთ მუსიკალური ცენტრის დირექტორი ბატონი გიორგი მიქელაძე და ამავე მუსიკალური ცენტრის არტ გენერალური ადმინისტრატორი ბატონი ჯაბა სალუქვაძე ეს პროექტი ასე მალე არ შედგებოდა. ამდენად მინდა აღვნიშნო რომ ნამდვილად დიდი ბედნიერებაა საქმეში ასეთი პროფესიონალი პარტნიორების ყოლა.

ამ ისტორიული პროექტის „ბათუმი-ვენა“ ურთიერთანამშრომლობის გრძელვადიან შეთანხმების მემორანდუმს, ხელი მოეწერა ავსტრიის ტერიტორიაზე, კერძოდ, საქართველოს საელჩოში - ვენაში. სადაც იყვნენ მოწვეული კულტურისა და ხელოვნების სფეროში მოღვაწე ავსტრიელი სტუმრები. მათ შორის მსოფლიოში აღიარებული არქიტექტორი ჰაიდულფ გერნგროსი, ცნობილი მწერალი და პროფესორი ბენედიქტ ლედებური, არტ კორდინატორი და პროექტების კურატორი მაიკლ ჰალი, ხელოვნების ნიმუშების კოლექციონერი, დოქტორი იოზეფ ჰილეკი, ხელოვნებათმცოდნე და მოქანდაკე ელიზაბეტ პინკერი, მოქანდაკე ბარბარა შტურმი და სხვები...

აქვე მინდა დიდი მადლობა გადავუხადო საქართველოს სრულუფლებიან ელჩს ავსტრიაში ბატონ კონსტანტინე ზალდასტანიშვილს თანადგომისა და მხარდაჭერისათვის. საქართველოს კონსულს ვენაში ბატონ ლაშა გიგიშვილს და აგრეთვე საელჩოს ყველა თანამშრომელს თანადგომისათვის.

და ბოლოს მინდა გითხრათ , რომ არც თუ ისე ადვილი იყო ასეთი ისტორიული პროექტის განხორციელება, მაგრამ როდესაც შედეგი საუკეთესოა და ასე ლამაზად გვირგვინდება დიდი საქმის საწყისი. ხვდები რომ საკუთარი თავის მადლიერი ხარ და უკვე მომავლის ნაბიჯებს უფრო გაბედულად გეგმავ.

ავტორი - დეა თავბერიძე