საქართველოს უმაღლეს საკანონმდებლო ორგანოში დღეს ფრაქცია „ნაციონალური მოძრაობის“ სხდომა გაიმართება. გუშინ გაკეთდა ოფიციალური განცხადება ენმ-ს გაყოფასთან დაკავშრებით, სწორედ ამიტომ, ფრაქციის შიგნით გარკვეული ცვლილებებია მოსალოდნელი.

ნაციონალურ მოძრაობას პარლამენტში პარტიის სახელით შესული 27 დეპუტატიდან, 21 გამოეყო და როგორც აცხადებენ, უმცირესობის სტატუსიც მათ დარჩებათ:

„სამწუხაროა რომ მოხდა პარტიის გაყოფა, თუმცა ახლა მნიშვნელოვანია, რომ ძალიან სწრაფად გავაგრძელოთ ხელისუფლების წინააღმდეგ მიზანმიმართული ბრძოლა და საქმიანობა იმისთვის, რომ ქვეყნის ეს შეფერხებული და მძიმე მდგომარეობა, კიდევ უფრო ჩიხში არ შევიდეს. ამისათვის საჭიროა საპარლამენტო დონეზე საორგანიზაციო საკითხების დროულად მოგვარება,“-განაცხადა ირაკლი აბესაძემ.