„გაზპრომთან“ მოლაპარაკებების წარმოება და მიღებული გადაწყვეტილებები რეზონანსული საკითხია. აღნიშნულთან მიმართებით პოლიტიკოსები განცხადებებს აკეთებენ. ექსპერტი თორნიკე შარაშენიძე მიიჩნევს, რომ ენერგეტიკის სამინისტრომ გარკვეულ კითხვებს პასუხი უნდა გასცეს, თუმცა არსებულ შეთანხმებაში კატასტროფული არაფერია, რადგან საქართველოსთან ამ მიმართულებით გარკვეული კონტრაქტი არსებობდა, თუმცა დღეისათვის მივიღეთ უარესი კონტრაქტი:

„ამ შეთანხმებაში კატასტროფული არაფერი არ არის, შეიძლება გაიმართლოს თავი ენერგეტიკის სამინისტრომ, ეს შეთანხმება ისეთია, როგორც ფორმდება ხოლმე საერთაშორისო პრაქტიკის მიხედვით. აქამდე ჩვენ ვიღებდით გაზს, რაც იყო ძალიან მომგებიანი, რუსები გვეუბნებოდნენ, რომ საერთაშორისო პრაქტიკაში მიღებული ეს არ არის, აქამდე როგორღაც ვიგერიებდით მათ. ახლა კალაძემ რატომღაც ვერ მოიგერია. კატასტროფული კონტრაქტი არ არის, მაგრამ არის უარესი კონტრაქტი. ჯერჯერობით დეტალებს ისინი არ ახმაურებენ, შესაძლოა ზეწოლა მიდიოდა იმ კუთხით, რომ ჩვენ დაგტოვებთ სომხეთთან ერთი-ერთზე და თქვენ დაელაპარაკეთ ფასზე და მიყიდეთ მათ გაზი, მაგრამ ეს ეფექტური ხერხი ვერ იქნებოდა, რადგან სომხეთის მთელი გაზგამანაწილებელი სისტემა არის რუსეთის ხელში, იქაც „გაზპრომია“ რეალურად. ეს ბერკეტი შესაძლოა ერთი შეხედვით ეფექტურია, მეორეს მხრივ შესაძლოა გვეთქვა, რომ იქაც „გაზპრომია“ და რაზე ვვაჭრობთ? ზეწოლის მეორე ბერკეტი შესაძლოა ყოფილიყო ის, რომ ეთქვათ თუ ამაზე არ წამოხვალთ ირანიდან მივაწვდით სომხეთს გაზსო, ჩვენ, როგორც სატრანზიტო ქვეყანა ამოვვარდებოდით საერთოდ. ის კი ფაქტია, რომ ამდენი ხანია ეს კონტრაქტი არსებობდა, ჩვენთვის ძალიან კარგი, ახლა მივიღეთ კონტრაქტი, რომელიც ჩვენთვის კარგი აღარ არის, არც კატასტროფაა წესით, მაგრამ რატომ? რა მოხდა ისეთი წელს, რაც არ ხდებოდა შარშან? ეს კითხვა უნდა დავისვათ ენერგეტიკის სამინისტროს.

საფრთხეს ვხედავ იმაში, რომ რუსული ტელეარხები ჩვეულებრივად მაუწყებლობენ საქართველოში, გამოდის არაერთი ქართულ ენოვანი საშუალება, რომელიც აშკარად ემსახურება რუსეთის ინტერესებს. ეს უფრო საფრთხისშემცველია, ვიდრე ეს კონტრაქტი, ეს კონტრაქტი არის ერთი პატარა დეტალი“, - განაცხადა თორნიკე შარაშენიძემ.