,,რადგანაც არსებობს პოლიტსაბჭოს გადაწყვეტილება, მოვალე ვარ გადავრიცხო თანხა ღონისძიების ჩასატარებლად“

,,რადგანაც არსებობს პოლიტსაბჭოს გადაწყვეტილება, მოვალე ვარ გადავრიცხო თანხა ღონისძიების ჩასატარებლად“ - რატიანი

პოლიტიკა - 13:19, 11 Jan, 2017

2474

არალეგიტიმურს უწოდებს ,,ნაციონალური მოძრაობის“ 20 იანვარს დაგეგმილ ყრილობას პარტიის აღმასრულებელი მდივანი სერგო რატიანი. ამის შესახებ მის განცხადებაშია აღნიშნული. თუმცა რატიანი იქვე განამრტავს, რომ ხელშეკრულებით გათვალისწინებულ თანხას, რომელიც სპოტრის სასახლის ადმინისტრაციასთან უკვე შეთანხმებულია, ის ვალდებულად თვლის თავს, აღნიშნული თანხა გადარიცხოს პარტიულ ღონისძიების ჩასატარებლად, ,,რადგანაც არსებობს პოლიტსაბჭოს და პატიული ორგანიზაციების თავმჯდომარეების ნაწილის მოთხოვნა“.

,,საზოგადოებას მოეხსენება, რომ ერთიანი ნაციონალური მოძრაობის პოლიტიკურმა საბჭომ 30 ნოემბერს მიიღო და დაამტკიცა „ერთიანი ნაციონალური მოძრაობის VII პარტიული ყრილობის მოწვევისა და დელეგატების შერჩევის წესი“ რომლის თანახმად, ყრილობის გამართვის თარიღად 20 იანვარი, ხოლო დელეგატების რაოდენობა 7000-ით განისაზღვრა.

მე, როგორც აღმასრულებელმა მდივანმა, მეორე დღესვე მივმართე წერილობით სპორტის სასახლის ადმინისტრაციას. რამდენიმე დღეში გაფორმდა ხელშეკრულებაც, რომლის თანახმად, თანხის გადახდის ბოლო ვადა არის 18 იანვარი.

საზოგადოებისთვის ასევე ცნობილია, რომ დღეისათვის პოლიტიკური საბჭოს არ დაუმტკიცებია ყრილობის სამართლებლივად ჩატარებისათვის უმნიშვნელოვანესი საკითხები. როგორ და რა წესით ხდება დელეგატთა შესათახმებლად კონფერენციების მოწვევა, როგორ დგება ყრილობის დღის წესრიგი, როგორ განისაზღვრება ყრილობაზე ხმის მიცემისა და დათვლის პროცედურები. აღსანიშნავია ისიც, რომ 2016 წლის 30 ნოემბრის გადაწყვეტილების დარღვევით დელეგატთა შერჩევა უკვე მიმდინარეობს.

მოგახსენებთ, რომ ჩვენი პოზიცია დღესაც უცვლელია და მიგვაჩნია, რომ პოლიტიკური საბჭოს წესის დარღვევით შექმნილი „საორგანიზაციო კომისიისა“ და მისი მხარდამჭერების არჩეული გზით, 2017 წლის 20 იანვარს ჩატარებული ყრილობა შეუძლებელია ჩაითვალოს ლეგიტიმურად, იურიდიულად გამართულად და სათანადოდ ორგანიზებულად.

მიუხედავად ამისა, რადგანაც არსებობს პოლიტსაბჭოს გადაწყვეტილება, რადგანაც არსებობს პატიული ორგანიზაციების თავმჯდომარეების ნაწილის მოთხოვნა, მე მოვალე ვარ გადავრიცხო სპორტის სასახლესთან გაფორმებული ხელშეკრულებით გათვალისწინებული თანხა პარტიული ღონისძიების ჩასატარებლად” - აცხადებს რატიანი.