ვანდალიზმი - პრეზიდენტი ოკუპანტების მიერ აფხაზეთში ეკლესიისა და სასაფლაოს დანგრევის გამო საერთაშორისო ორგანიზაციებს რეაგირებას სთხოვს

პოლიტიკა - 13:08, 10 Jan, 2017

3198

საქართველოს პრეზიდენტი გიორგი მარგველაშვილი აღშფოთებას გამოთქვამს რუსეთის ფედერაციის საოკუპაციო ძალების მიერ აფხაზეთში 19-ე საუკუნის ეკლესიისა და პოლონელთა სასაფლაოს დანგრევის გამო და აღნიშნულ ფაქტს შეგნებულად განხორციელებულ ვანდალიზმის აქტს უწოდებს.

„გამოვხატავთ უკიდურეს აღშფოთებას რუსეთის ფედერაციის საოკუპაციო ძალების მიერ აფხაზეთში, სოფელ წებელდაში ისტორიული მემკვიდრეობის ძეგლების განადგურებასთან დაკავშირებით.

სამხედრო პოლიგონის მოწყობის მიზნით რუსეთის ფედერაციის შეიარაღებულმა ძალებმა დაანგრიეს 19-ე საუკუნის ეკლესია და პოლონელთა ისტორიული სასაფლაო.

ეს არის შეგნებულად განხორციელებული ვანდალიზმის აქტი, რაც უხეშად არღვევს საერთაშორისო სამართლის ნორმების, მათ შორის ჰააგის 1954 წლის კონვენციის პირობებს.

მივმართავთ საერთაშორისო თანამეგობრობას, იუნესკოს და სხვა საერთაშორისო ორგანიზაციებს, სათანადოდ შეფასონ რუსეთის ფედერაციის მიერ საქართველოს ტერიტორიაზე განხორციელებული უკანონო ქმედებები და მოახდინონ მათზე შესაბამისი რეაგირება”, - აღნიშნულია საქართველოს რპეზიდენტის განცხადებაში.

2011 წელს, აფხაზეთის ე.წ. მთავრობის მთავრობამ სოფელი წებელდის მიმდებარე ტერიტორია რუსეთის თავდაცვის სამინისტროს გადასცა ერთობლივი სამხედრო წვრთნებისა და სწავლებისთვის. მოგვიანებით, ტერიტორიაზე სამხედრო პოლიგონის აშენება დაიწყო.

მშენებლობას პოლიგონის ხელმძღვანელი ვიქტორ გრიშენკო კურირებდა.

3 იანვარს აღნიშნულ ტერიტორიაზე მძიმე ტექნიკა გამოჩნდა. მშენებლობისთვის ტერიტორიის მომზადებისას, ბულდოზერებმა ეკლესია დაანგრიეს და შენობის ფრაგმენტები იქვე მიმოფანტეს. იგივე მედი ეწია პოლონელთა ისტორიულ სასაფლაოსაც.