"მე გიგა ბოკერიას არ წარმოვადგენ, ნიკა მელია მე წარმომადგენდა"

"მე გიგა ბოკერიას არ წარმოვადგენ, ნიკა მელია მე წარმომადგენდა" - გიგი უგულავა

პოლიტიკა - 17:09, 09 Jan, 2017

17581

თბილისის ყოფილმა მერმა გიგი უგულავა "ერთიან ნაციონალურ მოძრაობაში" მიმდინარე პროცესებზე კიდევ ერთი განცხადება გააკეთა.
უგულავას თქმით, ის საქართველოს მესამე პრეზიდენტს ესაუბრა, თუმცა საუბარი მოკითხვითი ხასიათის იყო.
”მიშასთან მქონდა საუბარი, თუმცა ძნელია მობილურით კომუნიკაცია . საუბარი იყო მოკითხვით, ადამიანურ დონეზე. შეხვედრის სურვილი არსებობს, თუმცა ჯერჯერობით ეს ვერ ხერხდება, რადგან მე ვერ ვტოვებ ქვეყანას, ხოლო მიშა ვერ ჩამოდის საქართველოში. რაც შეეხება მის პოზიციას პარტიის დაშლასთან დაკავშირებით, ეს თავად მან უნდა დააფიქსიროს, მე ვერაფერს გეტყვით”, - თქვა გიგი უგულავამ ჟურნალისტების შესაბამისი კითხვის საპასუხოდ.
თბილისის ყოფილი მერი, ნიკა მელიას განცხადებას გამოეხმაურა, რომლის მიხედვითაც, "გიგი უგულავა არ არის შემრიგებელი ადამიანი, ის გიგა ბოკერიას მხარეა".

”მე გიგა ბოკერიას არ წარმოვადგენ, წარმოვადგენ ”ერთიან ნაციონალურ მოძრაობას”. ნიკა მელია ოდესღაც მე წარმომადგენდა. ნიკა მელიას გავუხსენი ამ პარტიაში გზა და სამწუხაროა, მისი ქცევები. მე მასთან არც პოლემიკაში ვაპირებ შესვლას და არც დაპირისპირებაში"- აღნიშნა უგულავამ.
რაც შეეხება ენმ-ში მიმდინარე დაპირისპირებას, უგულავა აცხადებს, რომ პარტია არის კრიზისში.
"თუ გვეყოფა პასუხისმგებლობა, რომ პარტიამ ეს კრიზისი გაიაროს, გაივლის, თუ ვერა და დარჩენილია ძალიან ცოტა რესურსი, შეიძლება ვთქვათ 2-5% და შესაძლოა, ეს ყოველდღიურად მცირდებოდეს. მიმდინარე მოვლენები უნდა განვითარდეს ცივილურ ფორმებში, რადგან ამ ქვეყანას იმაზე დიდი პრობლემები აქვს, ვიდრე დაპირისპირებაა ”ნაციონალურ მოძრაობაში”, - განაცხადა გიგი უგულავამ.