ენმს წევრებს რატიანის დავალებით პარტიის კარი ჩაუკეტეს? - ბოკერიას ხულოს ორგანიზაციის დესტაბილიზაციაში ადანაშაულობენ

პოლიტიკა - 14:46, 09 Jan, 2017

3571

ხულოში ნაციონალური მოძრაობის დელეგატების შერჩევის პროცესი პარტიის ოფისის ეზოში მიმდინარეობს, რადგან რაიონული ორგანიზაციის შენობა დაკეტილია. კონფერენციის მონაწილეები კახა დეკანაძეს ერთი საათის განმავლობაში ელოდნენ, თუმცა, იგი არ მივიდა. დეკანაძე აღნიშნული პროცესის ლეგიტიმაციას ეჭვქვეშ აყენებს, სწორედ ამიტომ მიიჩნევს, რომ მიღებული გადაწყვეტილებები უკანონო იქნება.

„ნაციონალური მოძრაობის“ წევრები, რომლებიც ამ წუთებში პარტიის ოფისში არიან შეკრებილი, კახა დეკანაძეს გიგა ბოკერიასთან კავშირში ადანაშაულებენ და არ გამორიცხავენ, რომ 20 იანვრის ყრილობის შემდეგ მისი პასუხისმგებლობის საკითხიც დადგეს.

„უამრავი ამომრჩეველია მოსული, ველოდებით ოფისთან და კარს არ აღებს, ამბობს, რომ ბატონმა სერგომ დამავალაო. გამოვიდნენ ყველა სამართლებრივი ფორმიდან, პარტიის წევრებს პარტიის ოფისში არ უშვებენ, პარტიის ოფისი არ არის არავის კაბინეტი და არც კახა დეკანაძის და არც სერგო რატიანის კაბინეტია, ეს არის ოფისი, სადაც თავს უნდა იყრიდნენ „ნაციონალური მოძრაობის“ წევრები“, - აცხადებს ელგუჯა ბაგრატიონი.