დედაქალაქის ყოფილი მერი გიგი უგულავა „ერთიანი ნაციონალური მოძრაობის“ ოფისში შეხვედრაზე იმყოფებოდა. ენმ-ში მიმდინარე მოვლენებზე უგულავა პარტიის იმ ლიდერებს ესაუბრა, რომლებიც 20 იანვრისთვის დაგეგმილი ყრილობის ლეგიტიმურობას ეჭვქვეშ აყენებენ.

უგულავა მიიჩნევს, რომ პარტიაში არსებული დაპირისპირების მოგვარება აუცილებელია:

„რა თქმა უნდა, დემოკრატიულ სისტემაში ქვეყნისთვის მნიშვნელოვანი პარტიის შიდა პრობლემები დემოკრატიის პრობლემაა, მაგრამ ამ ქვეყანაში პრობლემა სხვა რამ არის. პრობლემის გასაღები დევს იქ, რომ უნდა მოხდეს არაფორმალური მმართველობის დასრულება. უნდა მოხდეს შეკავება და შემდეგ მშვიდობიანი ჩამოცილება. ეს უმრავლესობა არის ნელად მოქმედი ნაღმი, რომელმაც შეიძლება საქართველო ააფეთქოს,“ - განაცხადა უგულავამ.