დედაქალაქის ყოფილი მერის გიგი უგულავას გათავისუფლების თაობაზე საქართველოს პარლამენტის დეპუტატები კომენტარებს აკეთებენ. თამარ კორძაიამ თემის კომენტირებისას, მომხდარს პოლიტიკური გადაწყვეტილება უწოდა.

როგორც დეპუტატი აცხადებს, საუბარი არ არის სამართლიანი სასამართლოს გადაწყვეტილებაზე:

„უგულავას როგორც დაკავება, ასევე გათავისუფლება არის პოლიტიკური გადაწყვეტილება და ამასთან დაკავშირებით, მგონი საქართველოს მოქალაქეებს არ აქვთ ეჭვები. ტავისთავად ის ფაქტი, ორსაათიანი გათავისუფლება, შემდეგ ციხეში შებრუნება, ამ ვითარებაში მისი გათავისუფელბაც, ცალსახად არის პოლიტიკური გადაწყვეტილება და ნამდვილად არ გავქვს საქმე სამართლიანი სასამართლოს გადაწყვეტილებასთან“, - განაცხადა თამარ კორძაიამ.

შეგახსენებთ, რომ დედაქალაქის ყოფილი მერი გიგი უგულავა, თითქმის სამწლიანი პატიმრობიდან გუშინ გათავისუფლდა. სააპელაციო სასამართლოს გადაწყვეტილებით, უგულავას სასჯელი შეუმცირდა, მან 1 წელი 3 თვე და 22 დღე შეადგინა, „ამნისტიის შესახებ კანონის“ შესაბამისად კი უგულავა სასჯელაღსრულებითი დაწესებულებიდან გუშინ საღამოს გათავისუფლდა.