დედაქალაქის ყოფილი მერი გიგი უგულავა სასჯელაღსრულებითი დაწესებულებიდან გათავისუფლების შემდეგ, „ნაციონალური მოძრაობის“ წევრთა ნაწილს შეხვდა. შეხვდრის დასრულების შემდეგ, გიგა ბოკერიამ ისაუბრა იმ მიზნებზე, რაც ენმ-ს გარკვეულ ჯგუფს სამომავლოდ გააჩნია:

„ჩვენი ამოცანა არის, პირველ რიგში, ქვეყნის შიგნით, დემოკრატიული და მშვიდობიანი გზით ივანიშვილის რეჟიმის დამარცხება. ეს არის პირველი ამოცანა, რაც აუცილებელია ჩვენი ქვეყნის გადარჩენისთვის და წინსვლისთვის შემდგომ. ამის შემდეგ ჩვენი ამოცანაა იმ გამოწვევებთან გამკლავება, რაც ქვეყნის წინაშე დგას და ასეთი სამწუხაროდ ძალიან ბევრია. ის გუნდი, რომელსაც ეს შეუძლია, აქვს რწმენა და ნებისყოფა, კომპეტენცია, არის გუნდი, რომელსაც ჩვენ წარმოვადგენთ“, - განაცხადა გიგა ბოკერიამ.

შეგახსენებთ, რომ დედაქალაქის ყოფილი მერი გიგი უგულავა, თითქმის სამწლიანი პატიმრობიდან გუშინ გათავისუფლდა. სააპელაციო სასამართლოს გადაწყვეტილებით, უგულავას სასჯელი შეუმცირდა, მან 1 წელი 3 თვე და 22 დღე შეადგინა, „ამნისტიის შესახებ კანონის“ შესაბამისად კი უგულავა სასჯელაღსრულებითი დაწესებულებიდან გუშინ საღამოს გათავისუფლდა.