"კვდება საზ.მაუს იდეა... გადაწყვეტილება მიიღო პირადად ბიძინა ივანიშვილმა"- ტაბლიაშვილი მაღლაფერიძის არჩევაზე

პოლიტიკა - 14:07, 06 Jan, 2017

4041

ჟურნალისტი ირაკლი ტაბლიაშვილი საზოგადოებრივი მაუწყებლის დირექტორად ვასილ მაღლაფერიძის არჩევას ეხმაურება. ტაბლიაშილი ამ პროცესებს საზოგადოებრივი მაუწყებლის იდეის განადგურებად აფასებს და აცხადებს, რომ გადაწყვეტილება არა საზოგადოებრივი მაუწყებლის სამეურვეო საბჭომ, არამედ პირადად ბიძინა ივანიშვილმა მიიღო:

„ვასილ მაღლაფერიძეს დიდი ხანია ვიცნობ.

ბოლოს, რამდენადაც მახსოვს, აგვისტოში შევხვდით ერთმანეთს, შემთხვევით... მარტვილის კანიონზე.

არასოდეს, არც ერთ თემაზე ერთმანეთს არ დავპირისპირებივართ... ის ჩემი ერთ-ერთი პირველი რედაქტორი იყო - გაზეთ კავკასიონში 1995-96 წლებში ვმუშაობდი.

მოკლედ, არასოდეს არ გვქონია მცირე გაუგებრობაც კი.

დღეს მე საზ.მაუწყებელში ვმუშაობ... პროექტი მაქვს - ვექტორი.

არ ვიცი, რას დაუპირებს ახალი გენ.დირი ამ პროექტს... ანუ, მიხურავს თუ არა.

და ამის მიუხედავად, ასე მგონია, რომ ჩემი აზრის დაუფიქსირებლობა, ახლა დადუმება და ა.შ. ჩემგანვეა არასწორი.

დამოუკიდებლად იმისა, რას უზამს ახალი დირექტორი ჩემ პროექტს, ვფიქრობ, გაჩუმება არასწორია.

ჰოდა, შესაბამისად - ბორდის წევრებო, რიტორიკულად გკითხავთ - გჯერათ, რომ ჩვენ გვჯერა, რომ დამოუკიდებლად მიიღეთ გადაწყვეტილება?

გჯერათ, რომ ჩვენ გვჯერა, რომ სოციალ-დემოკრატმა მარინა მუსხელიშვილმა დამოუკიდებლად მიიღო გადაწყვეტილება?

რეალურად, ეს გადაწყვეტილება მიიღო პირადად ბიძინა ივანიშვილმა და დამოუკიდებლად იმისა, როგორი დირექტორი იქნება მაღლაფერიძე, უშუალოდ მაუწყებელში ყოველთვის იქნება განცდა, რომ ის მოიყვანეს, თანამშრომლებს თავზე დაასვეს და ა.შ.

არადა, კარგი პროექტები ჰქონდა მაუწყებელს და ახლაც აქვს. არადა, კარგი გეგმები ჰქონდა მაუწყებელს.

ჰოდა, კიდევ ერთხელ ვკითხულობ - რატომ მიიღეთ ეს, პოლიტიკურად ანგაჟირებული გადაწყვეტილება? რატომ კლავთ საზ.მაუწყებლის იდეას?.. რატომ ცდილობთ, რომ მაუწყებელი გახდეს დამოკიდებული და დამოკიდებული ხელისუფლებაზე?

კვდება საზ.მაუს იდეა...

ვიქნები მე მაუწყებლის თანამშრომელი თუ არა, ეს იდეა მაინც კვდება.

და ის იოტისოდენა შანსიც კი, რომელიც არსებობდა, აღარ არსებობს.“- წერს ირაკლი ტაბლიაშვილი.