"მე მყავს „რჩეული“ ვისაც არ მივცემ ხმას"- სამეურვეო საბჭო საზმაუს გენდირექტორს ირჩევს

პოლიტიკა - 11:45, 06 Jan, 2017

1169

საზოგადოებრივი მაუწყებლის გენერალური დირექტორის ვინაობა დღეს გაირკვევა. სამეურვეო საბჭოში კენჭისყრას იწყებს.

საბჭოს წევრებმა არჩევანი 5 კანდიდატს შორის უნდა გააკეთონ. მეორე ტურში მონაწილეობენ ვასილ მაღლაფერიძე, ნინო ზაუტაშვილი, ზაალ ანჯაფარიძე, ნათია კუპრაშვილი და თინათინ ბერძენიშვილი.

გამარჯვებისთვის 8-დან 5 საბჭოს წევრის ხმა არის საჭირო.

საქართველოს საზოგადოებრივი მაუწყებლის სამეურვეო საბჭოს წევრის სულხან სალაძის განცხადებით, მას არ აქვს ინფორმაცია, რომ საბჭოს წევრებზე შესაძლოა რაიმე ზეწოლა ხორციელდებოდეს:

„პირველ და მეორე ტურებში კენჭისყრა არის ფარული, ეს არის გარანტია იმისა , რომ სამეურვეო საბჭოს წევრმა აარჩიოს ის კანდიდატი ვისზეც, პირობითად რომ ვთქვათ, ის ფსონს დებს. მე არ მქონია არანაირი ინფორმაცია იმისა, რომ სამეურვეო საბჭოს წევრებზე რაიმე ზეწოლა ხორციელდება, ამას ვერ დავადასტურებ. კანდიდატებს შორის მე მყავს „რჩეული“ ვისაც არ მივცემ ნამდვილად ხმას. რაც შეეხება იმას ვისაც ხმას მივცემ მის ვინაობას ჩემთვის დავიტოვებ.“- განაცხადა სალაძემ.

„ეს პროცედურა არის ორ ეტაპიანი, პირველ ეტაპზე თუ რომელიმე კანდიდატმა აიღო 5 ხმა , მაშინ პირველ ტურშივე გაირკვევა დირექტორის ვინაობა, თუ მეორე ტური გახდა საჭირო მაშინ მეორე ტურში ხმათა უმრავლესობის მქონე კანდიდატი გახდება დირექტორი, თუ მეორე ტურში ხმები გაიყო, მაშინ იმართება ღია კენჭისყრა და გადამწყვეტი არის სამეურვეო საბჭოს თავმჯდომარის ხმა.“- განაცხადა სამეურვეო საბჭოს წევრმა ქეთევან მსხილაძემ.