,,პარტიის პოლიტსაბჭო უფუნქციო და არაქმედითი გახდა“

,,პარტიის პოლიტსაბჭო უფუნქციო და არაქმედითი გახდა“ - ზურაბ ჭიაბერაშვილი

პოლიტიკა - 02:19, 28 Dec, 2016

1508

,,ნაციონალური მოძრაობის” ყრილობის დროულად ჩატარებისა და მისი ლეგიტიმურობის რისკებზე საუბრობს ზურაბ ჭიაბერაშვილი. როგორც მან პარტიის პოლიტსაბჭოს ჩაშლის შემდეგ ჟურნალისტებთან კომენტირებისას განაცხადა, პარტიის მმართველი ორგანო პრაქტიკულად არაქმედითად გამოცხადდა. მისი თქმით, პოლიტსაბჭოს ყრილობასთან დაკავშირებულ საკითხებზე უნდა ემსჯელა, რაც ასევე ვანო მერაბიშვილისა და გიგი უგულავას თხოვნა იყო.

”ჩემთვის ძალიან სამწუხაროა, რომ პოლიტსაბჭოს ერთმა ნაწილმა არ მოინდომა, რომ ყრილობის წესები სამართლებრივად გამართული ყოფილიყო, რაც აუცილებელია იმისთვის, რომ ყრილობა ორგანიზებულად და ლეგიტიმურად ჩატარდეს. ასევე სამწუხაროა ისიც, რომ მათ უგულებელყვეს ვანო მერაბიშვილისა და გიგი უგულავას მიერ ციხიდან გამოგზავნილი თხოვნა, რომ პოლიტიკური საბჭო შეკრებილიყო და ამ საკითხებზე ემსჯელა, რადგან ყრილობის ორგანიზებულად და ლეგიტიმურად ჩატარება აუცილებელია, რათა პარტიაში არსებული უთანხმოება არ გაღრმავდეს და ძალიან ცუდ შედეგებამდე არ მიგვიყანოს. სამწუხაროდ, პოლიტსაბჭოს წევრთა ნაწილმა მიიღო სხვაგვარი გადაწყვეტილება“- განაცხადა ჭიაბერაშვილმა.

მისი თქმით, პროგნოზირება იმისა თუ როგორ განვითარდება მოვლენლები, რთულია. როგორც მან აღნიშნა, ყრილობისთვის აუცილებელია დელეგატების შერჩევის წესისა და სხვა შესაბამისი საკითხების მკაფიო გაწერა, რაც დროულ დაზუსტებას მოითხოვს.

,,რაც უფრო დიდხანს ვერ დაზუსტდება ეს წესი, მით უფრო მეტი რისკი ექნება ყრილობის დროულად ჩატარებას, ან მის სამართლიანობას და ლეგიტიმურობას. დღეს, პრაქტიკულად იმის გამო, რომ პოლიტსაბჭო უფუნქციო და არაქმედითი გახდა, საფუძველი ეყრება ყრილობის არალეგიტიმურობის საკითხს”, - განაცხადა ზურაბ ჭიაბერაშვილმა.