სამხედრო სავალდებულო სამსახურის რეფორმის გეგმას სახელმიწფო კომისია მოამზადებს

პოლიტიკა - 20:52, 27 Dec, 2016

1320

თავდაცვისა და უშიშროების კომიტეტში თავდაცვის, შინაგან საქმეთა, სასჯელაღსრულების და პრობაციის, რეგიონული განვითარებისა და ინფრასტრუქტურის სამინისტროების და შესაბამისი უწყებების წარმომადგენლებთან დახურული სამუშაო შეხვედრები გაიმართა.

საკანონმდებლო და აღმასრულებელი ხელისუფლების წარმომადგენლებმა თავდაცვის სისტემაში დაგეგმილ რეფორმაზე, სამხედრო სავალდებულო სამსახურში ახალწვეულთა გაწვევის წესის რეგულაციებზე და სახელმწიფო შესყიდვებში არსებულ გამოწვევებზე კონსულტაციები გამართეს და სამოქმედო გეგმის პრიორიტეტები დასახეს.

„თავდაცვის მინისტრის პირველ მოადგილესთან და გენერალური შტაბის უფროსის მოადგილესთან გამართულ შეხვედრაზე თავდაცვის სამინისტროში დაგეგმილ რეფორმებზე და ოპტიმიზაციის პროცესზე ვისაუბრეთ. დეტალურად განვიხილეთ თვითოეულ სტრუქტურულ ერთეულში რეფორმირების გეგმები, რომლებიც არსებულ საჭიროებებს ეფუძნებათ. ყველა ვთანხმდებით, რომ ეს პროცესი ქვეყნის თავდაცვის უწყების სტრუქტურის სწორად დალაგებისთვის და თავდაცვისუნარიანობის განმტკიცებისათვის გარდაუვალია. ვფიქრობ, რომ საზოგადოებაში გადამეტებული აჟიოტაჟია სამსახურებიდან სამხედრო მოსამსახურეების დათხოვნასთან დაკავშირებით, მინისტრის ბრძანების შესაბამისად ფულადი კომპენსაციები გაიცემა ყველა იმ პირზე ვისაც სამსახურის დატოვება მოუწევს. თუმცა ამ პროცესში საპარლამენტო ჩართულობა და კონტროლი მეტად მნიშვნელოვანია“, - განაცხადა ირაკლი სესიაშვილმა.

კომიტეტის თავმჯდომარემ სამხედრო სამსახურში გაწვევის წესის რეგულაციაზეც ისაუბრა და იგი მნიშვნელოვან რეფორმად შეაფასა. მისი განცხადებით, ყველა წვევამდელი, ვინც მსახურობს სხვადასხვა უწყებებში, საერთო ჯამში თავდაცვის მიზნებს უნდა ემსახურებოდეს და ახალგაზრდებს მეტი განვითარების საშუალება უნდა მიეცეს. ირაკლი სესიაშვილის ინფორმაციით, სწორედ ამ პრინციპების გათვალისწინებით შეიქმნება სახელმწიფო კომისია, რომელიც სამხედრო სავალდებულო სამსახურის რეფორმის გეგმას საფუძვლიანად მოამზადებს.

ძალოვან უწყებებში სახელმწიფო შესყიდვების საკითხებზე მსჯელობისას, კომიტეტის თავმჯდომარემ აღნიშნა, რომ კოორდინირებული მუშაობით უნდა დადგინდეს სტანდარტი, რომელშიც ყველა მხარის ინტერესი იქნება გათვალისწინებული.

„სახელმწიფო შესყიდვებისას, ყურადღება უნდა დაეთმოს როგორც ადგილობრივი წარმოების ხელშეწყობას, ასევე არსებული რესურსების რაციონალურად გამოყენებას. მნიშვნელოვანია, რომ უწყებებს შორის კოორდინირებული მუშაობა შედგეს, რომ მოხდეს სტანდარტებზე შეთანხმება. იმ სტანდარტების, რომლებიც ხარისხობრივადაც და ეკონომიურობის თვალსაზრისით ძალიან მნიშვნელოვან ეფექტს მოგვცემს“, - აღნიშნა ირაკლი სესიაშვილმა.