ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე საგარეო საქმეთა სამინისტროს მიერ წარმოდგენილი საქართველოს სახელმწიფო ანგარიშების პირველადი პროექტები მოისმინეს.

მინისტრის მოადგილემ ხათუნა თოთლაძემ კომიტეტს „შეიარაღებულ კონფლიქტში ბავშვთა მონაწილეობის თაობაზე ბავშვის უფლებათა კონვენციის“ დამატებითი ოქმის და „ბავშვთა ვაჭრობის, ბავშვთა პროსტიტუციისა და ბავშვთა პორნოგრაფიის თაობაზე ბავშვის უფლებათა კონვენციის“ დამატებითი ოქმის საქართველოს მიერ იმპლემენტაციის შესახებ მომზადებული ანგარიში წარუდგინა.

მომხსენებლის ინფორმაციით, აღნიშნულ კონვენციებს საქართველო 2002 წლიდან შეუერთდა და ყოველ ორ წელიწადში სახელმწიფო ანგარიშები მზადდება, რაც შეეხება პოლო პერიოდში მომზადებულ მოხსენებებს, ისინი ჯერ კიდევ 2007-2011 წლებში უნდა მომზადებულიყო, თუმცა მათი წარდგენა დაგვიანდა.

მინისტრის მოადგილემ ანგარიშების მომზადების სპეციფიკაზე, მათზე მომუშავე სახელმწიფო და არასამთავრობო ორგანიზაციების ჩართულობასა და ანგარიშებში მოცემულ მიმართულებებზე ისაუბრა. კომპეტენციების ფარგლებში სახელმწიფო ანგარიშებში უწყებების საქმიანობის თაობაზე მოხსენებები იუსტიციის, შინაგან საქმეთა, თავდაცვის, შრომის, ჯანმრთელობისა და სოციალური დაცვის და განათლებისა და მეცნიერების სამინისტროების წარმომადგენლებმა გააკეთეს.

მათ ბავშვთა უფლებების დაცვის მიმართულებით გატარებულ რეფორმებსა და იმ პრევენციულ ღონისძიებებზე ისაუბრეს, რასაც შეიარაღებულ კონფლიქტებში ბავშვთა მონაწილეობის არ დაშვება და ბავშვთა ტრეფიკინგის, ვაჭრობის და პროსტიტუციის წინააღმდეგ მიმართული სამუშაოები წარმოადგენდა. საკითხის განხილვისას, კომიტეტის სხდომაზე შეკითხვები დაისვა და დამატებითი რეკომენდაციები გამოითქვა, რაც სახელმწიფო ანგარიშის საბოლოო ტექსტში აისახება.

კომიტეტის სხდომის დღის წესრიგის მეორე საკითხს საკანონმდებლო წინადადების განხილვა წარმოადგენდა. კომიტეტის თავმჯდომარის, სოფო კილაძის განმარტებით, აღნიშნული საკანონმდებლო წინადადება იურიდიულ საკითხთა კომიტეტში უკვე შესულია და საკითხზე მუშაობა დაწყებულია, შესაბამისად ადამიანის უფლებათა დაცვისა და სამოქალაქო ინტეგრაციის კომიტეტის საკანონმდებლო წინადადების შინაარსობლივად არ განხილვას და დაელოდება იურიდიული კომიტეტის დასკვნას.