პარლამენტი საგარეო პოლიტიკის შესახებ რეზოლუციის მიღებას გეგმავს

პოლიტიკა - 15:55, 27 Dec, 2016

1283

საგარეო პოლიტიკასთან დაკავშირებით პარლამენტი რეზოლუციის მიღებას გეგმავს, რომელშიც უალტერნატივო პრიორიტეტად ევროკავშირთან ინტეგრაციაა დასახელებული, მთავარ მოკავშირედ კი ამერიკის შეერთებული შტატები. დოკუმენტში ასევე საუბარია რუსეთთან რაციონალურ პოლიტიკის გატარებაზეც. მმართველი გუნდის განცხადებით აუცილებელია ამ გზავნილების უმაღლეს დონეზე კიდევ ერთხელ დეკლარირება.

"ერთერთი პირველი საკითხი, რასაც ვეხებით, ეს არის, სწორედ, სუვერენიტეტის გაძლიერება, დეოკუპაცია, მშვიდობიანი გზით საქართველოს ტერიტორიული მთლიანობის აღდგენა. ძირითად პრიორიტეტად მოცემულია ევროკავშირთან ურთიერთობა და საკმაოდ თამამი ტექსტით წერია, რომ ჩვენი მიზანი იქნება ევროკავშირში გაწევრიანება,“ - განაცხადა პარლამენტის ევროპასთან ინტეგრაციის კომიტეტის თავმჯდომარე, თამარ ხულორდავამ. მან იმედი გამოთქვა, რომ აღნიშნულ რეზოლუციას პრეზიდენტის მხრიდანაც ექნება მხარდაჭერა.

ჩვენ გვაქვს რუსეთთან დიალოგის ფორმატი, რომელიც მათ საერთაშორისო კონტექსტში აჯენს, იმისთვის რომ დაუფიქრებელი ნაბიჯები არ გადადგან. ჩვენ ვცდილობთ, რომ საერთაშორისო თანამეგობრობა მუდმივად გვყავდეს საქმის კურსში, ამ საკითხებთან დაკავშირებით ერთის მხრივ და მეორეს მხრივ რუსეთი ყოველთვის იყოს მოლაპარაკების მაგიდასთან. ჩვენ გვაქვს არჩევანი - წავყვეთ იმ თამაშს, რომელსაც გვთავაზობს რუსეთი, ან საერთაშორისო თანამეგობრობასთან ერთად გავაპროტესტოთ, დავაფიქსიროთ ეს გაფართოება მათი ოკუპირებული ტერიტორიების და ვიბრძოლოთ მთლიანად ტერიტორიების დაბრუნებისთვის, მათი არაღიარების პოლიტიკისთვის“- განცხადა პარლამენტის საგარეო ურთიერთობათა კომიტეტის თავმჯდომარის მოადგილე დიმიტრი ცქიტიშვილმა.